Хятадад үйлдвэрлэлийн инфляц 2022 оны оны зургадугаар сараас хойших дээд түвшинд хүрлээ

Хятадын Үндэсний статистикийн хорооны мэдээлснээр, тус улсын үйлдвэрлэлийн инфляц аравдугаар сард 5.7 хувьд хүрч, өмнөх сараас 0.7 хувиар тэлснээр 2022 оны зургаадугаар сараас хойших дээд түвшинд хүрлээ. Ийнхүү тус үзүүлэлт гурав дахь сардаа дараалан өсөлт үзүүлж буй бөгөөд “Reuters” агентлагийн санал асуулгад оролцсон эдийн засагчдын 5.3 хувийн таамгийг даваад байна.

Инфляц ийнхүү эрчимжихэд эрчим хүч болон түүхий эдийн үнийн өсөлт голлон нөлөөлжээ. Тухайлбал, нүүрс олборлолт, баяжуулалтын салбарын үйлдвэрлэлийн өртөг тайлант хугацаанд өмнөх оноос 36.6 хувиар нэмэгдсэн бол газрын тос, байгалийн хийн олборлолтын салбарынх 35.0 хувийн өсөлт үзүүлсэн байна. Мөн үйлдвэрлэгчдийн худалдан авч буй түлш, эрчим хүчний үнэ 18.6 хувиар ахижээ.

Харин хэрэглээний инфляц аравдугаар сард 0.7 хувьд хүрсэн нь өмнөх сараас 0.2 хувиар саарсан үзүүлэлт болов. Ингэснээр хэрэглээний үнийн өсөлт хоёр сар дараалан эрчимжсэний дараа анх удаа саарч, эдийн засагчдын 0.8 хувийн таамгаас доогуур гарлаа. Хэрэглээний үнийн өсөлт саарахад хүнсний бүтээгдэхүүний үнийн бууралт голлон нөлөөлсөн байна. Тодруулбал, хүнсний бүтээгдэхүүний үнэ тайлант хугацаанд өмнөх оны мөн үеэс 2.9 хувиар буурсан бол хүнсний бус бүтээгдэхүүний үнэ 1.5 хувиар өсчээ. Тухайлбал, хүнсний ногооны үнэ 16.9 хувиар ахисан бол, гахайн махны үнэ 8.6 хувиар буурсан байна.

Ийнхүү үйлдвэрлэгчдийн үнэ эрчимтэй өсч байгаа ч хэрэглээний үнийн өсөлт харьцангуй сул хэвээр байна. Үүний зэрэгцээ Хятадын эдийн засаг гуравдугаар улиралд хүлээлтээс давсан өсөлт үзүүлж, есдүгээр сарын жижиглэн худалдааны үзүүлэлт таамаглалаас өндөр гарсан нь эдийн засгийн идэвхжилд эерэг дохио болжээ.