Цомхон орон зай эзлэх чанар нь тэжээвэр амьтны зах зээлд муурыг "ноён" болгожээ

Шатахуун, хүнсний үнийн өсөлт өрхийн төсвийг хумиж байгаа ч АНУ-д муурны хоол, амттан болон бусад бүтээгдэхүүний борлуулалт сэргэжээ. Харин нохойн бүтээгдэхүүний эрэлт суларсан хэвээр байгаа нь тэжээвэр амьтны зах зээлд хэрэглэгчдийн сонголт өөрчлөгдөж буйг харуулав.

“Америкийн тэжээвэр амьтны бүтээгдэхүүний холбоо”-ны мэдээлснээр муур тэжээдэг өрхийн тоо 2025 онд таван хувиар нэмэгдэж, 53 саяд хүрчээ. Муурны тоо нэмэгдэхийн хэрээр хоол, нэмэлт тэжээл, дэвсгэр болон тавилгын эрэлт тогтвортой хадгалагдана гэсэн хүлээлт үйлдвэрлэгчид, жижиглэн худалдааны компаниудын дунд нэмэгдэж байна.

Муур, нохойн бүтээгдэхүүний борлуулалт яагаад зөрүүтэй байна вэ?

АНУ-ын хүнсний бүтээгдэхүүн үйлдвэрлэгч “General Mills” компани хамгийн сүүлийн улиралд муурны хоолны борлуулалт хоёр оронтой хувиар өссөнийг тайлагнав. Харин нохойн хоолны борлуулалт эсрэгээрээ өндөр нэг оронтой хувиар буурчээ.

Хоёр ангиллын зөрүүтэй гүйцэтгэлийн улмаас “General Mills”-ийн Хойд Америк дахь тэжээвэр амьтны бүтээгдэхүүний цэвэр борлуулалт өмнөх оны түвшинтэй ойролцоо гарсан байна. Компанийн гүйцэтгэх захирал Жефф Харменинг уг өөрчлөлтийг америкчууд муур олноор тэжээж, харин нохой тэжээх нь багассантай холбон тайлбарлав.

Тэжээвэр амьтны бүтээгдэхүүний онлайн худалдаа эрхэлдэг “Chewy” компани ч ижил чиг хандлага ажигласнаа мэдээлжээ. Гүйцэтгэх захирал Сумит Синх тайлангийн хурлын үеэр нохойн ангиллын үзүүлэлт суларч, муурны бүтээгдэхүүний борлуулалт сайжирч байгааг онцлов.

Зах зээлийн дотоод бүтэц ийнхүү өөрчлөгдөж буй нь онлайн жижиглэн худалдааны компаниудын үндсэн борлуулалтад ч нөлөөлж эхэлжээ.

Компаниудын хувьд муур зорилтот бүлэг нь боллоо

Тэжээвэр амьтны бүтээгдэхүүний жижиглэн худалдаа, үйлчилгээний “Petco Health and Wellness” компани хоёрдугаар улиралд мууранд зориулсан бүтээгдэхүүний борлуулалт хүчтэй байсныг мэдээлэв. Тус компани муурны амттаны “Candy Shop” брэндийг шинээр зах зээлд нэвтрүүлсэн байна.

“Petco”-ийн гүйцэтгэх захирал Жоэл Д. Андерсоны хэлснээр шинэ брэндүүд нь өргөн хэрэглээний бүтээгдэхүүн, нэмэлт тэжээл, дэвсгэр болон муурны тавилгын ангиллын өсөлтийг дэмжжээ.

Салбарын удирдлагууд муур тэжээхэд нохойноос харьцангуй бага зардал, арчилгаа шаарддагийг эрэлтийн өсөлтийн нэг шалтгаан гэж үзэж байна. Муур нь орон сууц зэрэг хязгаарлагдмал талбайд тэжээхэд тохиромжтой тул хэрэглэгчдийн амьдралын хэв маяг, санхүүгийн нөхцөлтэй илүү нийцэж байгаа аж.

Энэ бүхнээс харахад нийт хэрэглээ саарч буй үед муурны бүтээгдэхүүн тэжээвэр амьтны зах зээлийн өсөлтийн гол хэсэг болж байна. Харин үйлдвэрлэгчид уг эрэлтийг хадгалахын тулд бүтээгдэхүүн, савлагаа болон маркетингийн бодлогоо үргэлжлүүлэн шинэчлэх шаардлагатай болжээ.