Даруу магтаал хэлэлцээний уур амьсгалыг сайжруулж болох ч хэтрүүлбэл эрсдэлтэй

Хэлэлцээ ширүүсч, талуудын байр суурь гацаанд орсон үед толгой дохих, анхааралтай сонсох, даруухан сайшаах зэрэг жижиг дохио хүртэл ярианы ажлын ярианы үр дүнд нөлөөлдөг байна. Стэнфордын их сургуулийн илтгэгч Мэтт Абрахамсын үзэж буйгаар зөв "бялдуучлал"-ыг яг цагт нь тохирсон хэмжээнд ашиглавал өндөр эрсдэлтэй хэлэлцээний уур амьсгалыг зөөлрүүлж, итгэлцлийг нэмэгдүүлэх боломжтой.

Гэхдээ үр дүн нь худал магтаалаас илүүтэй хэр чин сэтгэлээсээ сонсогдож байгаагаас шалтгаална. Ярьж буй хүний үгийг таслалгүй сонсох, хэлсэн зүйлийг нь ойлгож буйгаа биеийн хэлэмжээр илэрхийлэх зэрэг энгийн үйлдэл харилцан хүндэтгэлийг бататгадаг аж.

Харин дөнгөж танилцсан хүнд сүржин магтаал хэлэх нь эсрэгээр нөлөөлж ч болзошгүй. Магтаалын цаана ашиг хүссэн санаархал мэдрэгдвэл харилцагч түүнийг чин сэтгэлийн хандлага бус, өөртөө ашигтайгаар нөлөөлөх оролдлого гэж хүлээн авах эрсдэлтэй.

Хэтрүүлсэн магтаал тохиролцооны боломжийг сулруулна

Албан тушаал, эрх мэдлийн ялгаа ихтэй хэлэлцээнд өөрөөс нь албан тушаалын зэрэглэл доогуур хүний магтаал илүү болгоомжлол төрүүлж болохыг Абрахамс сануулжээ. Хэрэв өндөр байр суурьтай оролцогч тухайн хүнийг “Надаас хүссэн зүйлээ авах гэж байна” гэж сэжиглэвэл хэлсэн сайшаалын үнэ цэн эрс буурна.

Хэт бялдуучлах нь хүнийг цөхөрсөн, туршлагагүй эсвэл тохиролцоонд хүрэхийн тулд хэт яарч буй мэт харагдуулж болно. Улмаар талуудын хоорондын зайг багасгахын оронд харилцан үл итгэх байдлыг нэмэгдүүлж, хэлэлцээ урагшлах боломжийг сулруулна.

Абрахамсын тайлбарласнаар хөнгөн магтаал итгэл үнэмшлийг өөрчлөх хүчтэй арга биш. “Итгэл үнэмшил ихэвчлэн бялдуучлалаар өөрчлөгддөггүй” хэмээн тэр онцолсон байна. Харин байр сууриа эргэн харахад нээлттэй хүнтэй ярилцах үед чин сэтгэлийн эерэг хандлага зөвшилцлийн эхлэл болж чадна.

Таатай орчныг урьдчилан бүрдүүлэх нь чухал

Абрахамс уулзалтаас өмнө нөгөө талын байр суурь, харилцааны хэв маяг болон ярианы зорилгыг тодорхойлж, таатай орчин бүрдүүлэхийг зөвлөжээ. Түүний хэлснээр ийм бэлтгэл нь бусдыг залилан чиглүүлэх оролдлого биш, харин талууд бие биеэ сонсох боломжийг нэмэгдүүлэх арга юм.

“Энэ бол манипуляцийн тухай биш. Та хүсч буй харилцааныхаа үр дүнд хамгийн зөв орчныг бүрдүүлэхийг л зорьж байна” гэж Абрахамс тайлбарлав.

Түүний хөтөлдөг “Think Fast, Talk Smart” харилцааны нэвтрүүлгийн гол санаа ч үүнтэй нийцдэг. Хэлэлцээний үед хэтрүүлсэн магтаал хуурамч сонсогдож, тохиролцох орон зайг хумих магадлалтай бол анхааралтай сонсох, даруухан сайшаах зэрэг жижиг дохио бодит хүндэтгэлийг илэрхийлж, яриа хэлэлцээ урагшлах суурь бүрдэнэ.