Эдийн засагчид Японы Төв банк 2027 оны дунд үе хүртэл бодлогын хүүг өсгөнө гэж таамаглаж байна

Эдийн засагчид дунд явуулсан CNBC-ийн сүүлийн үеийн санал асуулгад оролцсон 16 эдийн засагч бүгд Японы Төв банк энэ долоо хоногийн баасан гарагт өндөрлөх хоёр өдрийн ээлжит хурлаараа бодлогын хүүг 1.25 хувьд хэвээр үлдээнэ хэмээн таамаглаж байна.

Эдийн засагчдын үзэж буйгаар тус банк өнгөрсөн сард бодлогын хүүг сүүлийн 31 жилийн дээд түвшинд хүргэн өсгөсөн тул энэ удаад түр азнах төлөвтэй байгаа юм. Гэсэн хэдий ч Японы суурь инфляцын болон цалингийн өсөлт үргэлжилсээр байгаа нь Төв банк арванхоёрдугаар сард эсвэл 2027 оны нэгдүгээр сард хүүг дахин өсгөх нөхцөлийг бүрдүүлж буй.

Хөрөнгө удирдлагын “Lombard Odier” компанийн макро стратегич Хомин Лигийн онцолсноор, Төв банк макро эдийн засгийн тоон үзүүлэлтүүдэд тулгуурлан мөнгөний бодлогыг үргэлжлүүлэн чангатгах нь зүйтэй шийдвэр болох юм. Гэсэн хэдий ч дотоодын бондын зах зээл эмзэг байдлаас үүдэн бодлого тодорхойлогчид санал нэг бодлогын хүүг өсгөхөд хүндрэлтэй байна.

Харин “Citi Research”-ийн эдийн засагч Сосүкэ Накамүра инфляц өндөр байгаа ч бодлогын хүүг дараалан өсгөх хэмжээнд хүрээгүйг тэмдэглэв.

Японы шинэ хүнсийг хасч тооцсон суурь инфляц есдүгээр сард жилийн дүнгээр 2.1 хувьд хүрч, он гарснаас хойших дээд түвшинд тогтворжжээ. Түүнчлэн иений ханш сул байгаа нь импортын өртгийг өсгөж, эрчим хүчний өндөр зардал хэрэглээний үнэ хөөрөгдөхөд нөлөөлсөөр байна. Гэсэн хэдий ч Засгийн газраас эрчим хүчний салбарт татаас олгож, үнийн өсөлтийн тодорхой хэсэг хэрэглэгчдэд дарамт учруулахаас сэргийлж буй.

Үүний зэрэгцээ инфляцад тохируулсан бодит цалингийн хэмжээ наймдугаар сард өмнөх оны мөн үеэс 1.5 хувиар нэмэгдэн, сүүлийн найман сар дараалан өсөлт үзүүлжээ. Цалингийн хэмжээ ийнхүү тогтвортой өсч байгаа нь дотоодын хэрэглээнээс үүдэлтэй инфляцын өсөлтийг өдөөж байгаа юм.

Японы Сангийн сайд Сацуки Катаяма өнгөрсөн долоо хоонгт парламентын гишүүдэд хандан тус улсын эдийн засаг "цалингийн өсөлтөөс үүдэлтэй 'тогтвортой' инфляцын үе" рүү шилжих заагт тулж ирснийг мэдэгдсэн байна. Мөн импортын өртгийн өсөлт үнийн өсөлтөд нөлөөлж байгааг хүлээн зөвшөөрчээ.

"Reuters" болон " The Japan Times" агентлагуудын мэдээлснээр Японы Төв банк энэ удаагийн хурлаараа суурь инфляц 2 хувийн зорилтот түвшинд хэдийн хүрснийг зарлаж магадгүй байна. Ингэснээр дараагийн хурлаар бодлогын хүүг өсгөх үндэслэл "бэхжинэ" гэж үзэж байгаа юм.

Мөн CNBC-ийн судалгаанд оролцсон эдийн засагчдийн 13 нь Японы Төв банк бодлогын хүүг 2027 оны дунд үеэр 1.75-2.0 хувьд хүргээд өсөлтийн мөчлөгөө зогсооно хэмээн таамаглаж байна.