ХБНГУ-ын хэт барууны “Германы төлөөх Альтернатив” нам Саксони-Анхальт мужийн сонгуульд 44%-аар саналаар тэргүүллээ

Германы хэт барууны “Германы төлөөх Альтернатив” нам ням гарагт болсон Саксони-Анхальт мужийн сонгуульд 44 хувийн санал авч тэргүүллээ. Ингэснээр Дэлхийн хоёрдугаар дайнаас хойш Германд хэт барууны нам мужийн түвшинд засгийн эрх авахад хамгийн ойр үр дүн үзүүлэв. Тус нам дангаараа Засгийн газар байгуулах хэмжээний олонх авч чадаагүй ч Канцлер Фридрих Мерцийн консерватив хүчнийг хол орхижээ. Германы олон нийтийн телевизийн мэдээлснээр сонгогчдын ирц 77 хувьд хүрсэн байна. Саксони-Анхальт нь хоёр сая гаруй хүн амтай, хуучнаар Зүүн Германы бүрэлдэхүүнд байсан харьцангуй жижиг муж. Гэхдээ сонгуулийн үр дүн 2013 онд байгуулагдсан хэт барууны намын дэмжлэг сүүлийн жилүүдэд хэр эрчимтэй нэмэгдсэнийг харуулж байна. Тус намын муж дахь тэргүүлэх нэр дэвшигч, 35 настай Ульрих Зигмунд сонгуулийн үр дүнг “түүхэн” хэмээн тодорхойлов. Тэрбээр мужийн ялалтыг 2029 оны Холбооны сонгуулиар үндэсний хэмжээнд засгийн эрхийн төлөө өрсөлдөх эхний алхам гэж үзэж буйгаа өмнө нь мэдэгдэж байжээ.

Мерцийн Засгийн газрын дэмжлэг суларчээ Сонгуулийн үр дүн Канцлер Фридрих Мерцийн Засгийн газрын хувьд томоохон ухралт болов. Германы олон нийтийн телевизийн санал асуулгаар Саксони-Анхальтын сонгогчдын 87 хувь нь холбооны Засгийн газрын үйл ажиллагаанд сэтгэл дундуур байгаагаа илэрхийлжээ. Германы Эдийн засгийн судалгааны хүрээлэнгийн ерөнхийлөгч Марсель Фратцшер “Сонгуулийн үр дүн юуны түрүүнд холбооны Засгийн газарт итгэл үзүүлэхгүй байгаагийн илэрхийлэл” гэж “Reuters”-т тайлбарласан байна. Мерц Европын хамгийн том эдийн засгийг сэргээхийн тулд бизнест ээлтэй шинэчлэл хийж, төсвийн зарцуулалтыг нэмэгдүүлэхээр зорьж байгаа. Харин эдийн засгийн өсөлт сул хэвээр байгаа үед түүний Засгийн газрын бодлого болон олон нийттэй харилцах арга барил сонгогчдын дэмжлэгийг авч чадахгүй байгааг санал хураалтын дүн харууллаа. Хэт барууны намын дэмжлэг зөвхөн Саксони-Анхальтаар хязгаарлагдахгүй байна. Сүүлийн үндэсний санал асуулгаар тус нам 28 хувийн дэмжлэгтэйгээр Германд тэргүүлж байгаа бол Мерцийн консервативуудын дэмжлэг 20 хувьтай байна.

Засгийн газар байгуулах эсэх нь тодорхойгүй Германы голлох намууд хэт барууны намтай эвсэхээс татгалзсаар ирсэн тул Саксони-Анхальтын дараагийн Засгийн газар хэрхэн бүрдэх нь тодорхойгүй байна. Түүнчлэн Германы дотоодын тагнуулын байгууллагын муж дахь салбар тус намыг хэт барууны экстремист байгууллага гэж ангилдаг. Намын удирдлагууд уг тодорхойлолтыг няцааж, олон сая дэмжигчийг нь гутаасан улс төрийн оролдлого гэж үздэг. Мерцийн консервативууд бусад намуудтай Засгийн газар байгуулах хэлэлцээ хийхээ мэдэгдсэн ч бодлогын хувьд эрс ялгаатай хэд хэдэн хүчний дэмжлэг авах шаардлага үүсэж болзошгүй.

Цагаачлалын бодлогыг чангатгахаар зорьж байна Хэт барууны нам цагаачлалыг эрс хязгаарлах, сургуулийн бодлогод уламжлалт үнэт зүйлсийг түлхүү тусгах, төрийн санхүүжилттэй хэвлэл мэдээллийн тогтолцоог шинэчлэх зэрэг бодлогоор сонгуульд өрсөлджээ. Үндэсний хэмжээнд Оростой харилцаагаа сэргээх, Украинд үзүүлэх Германы дэмжлэгийг бууруулах, цаашлаад еврогийн нэгдсэн валютын тогтолцооноос гарахыг тус нам дэмждэг. Саксони-Анхальтын сонгуулийн дараа хэт барууны нам анх удаа мужийн Засгийн газрыг удирдах эсэх нь намуудын хэлэлцээнээс шалтгаална. Харин санал хураалтын дүн Германы уламжлалт намуудын дэмжлэг суларч, хэт барууны улс төрийн хүч үндэсний хэмжээнд улам бэхжиж буйг тодотголоо.