Хиймэл оюуны салбарын өрийн өсөлтийн улмаас Уолл Стрийтэд болгоомжлол үүсээд байна

АНУ-ын хөрөнгийн зах зээлийн голлох индексүүд түүхэн дээд түвшиндээ ойр байгаа ч хиймэл оюуны салбарын санхүүгийн тогтвортой байдалд хөрөнгө оруулагчдын болгоомжлол нэмэгдэж байна.

Мөн технологийн компаниудын хувьцааны ханш буурч, Засгийн газрын бонд болон бусад салбарын хувьцааны эрэлт өссөнөөр хөрөнгө оруулалтын урсгал өөрчлөгдөж байна.

Аравдугаар сарын 22-ны арилжаагаар зах зээлийн үнэлгээгээр жигнэсэн S&P 500 индекс 1.2 хувиар буурсан бол индексэд багтдаг 500 компанийг ижил жинтэй тооцдог хувилбар 0.5 хувиар өсчээ. “Capital Economics” байгууллагын зах зээлийн ахлах эдийн засагч Жеймс Райлигийн мэдээлснээр 1995 оноос хойш ийм хэмжээний зөрүү өмнө нь зөвхөн 1999 оны дөрөвдүгээр сарын 14 болон 2000 оны гуравдугаар сарын 30-нд бүртгэгдэж байв.

Энэ зөрүү нь зах зээлийн уналт бүх салбарыг ижил хэмжээнд хамрахгүйгээр өндөр үнэлгээтэй технологийн компаниудад төвлөрснийг илтгэж байна. Үүнтэй зэрэгцэн АНУ-ын Засгийн газрын 10 жилийн хугацаатай бондын өгөөж огцом буурсан нь хөрөнгө оруулагчид эрсдэл багатай хөрөнгө руу шилжиж байгаатай холбоотой байж магадгүй юм.

Хиймэл оюуны хөрөнгө оруулалтын санхүүжилтэд эргэлзээ нэмэгджээ Сүүлийн жилүүдэд АНУ-ын эдийн засгийн өсөлтийг дэмжсэн голлох хүчин зүйлсийн нэг нь хиймэл оюуны дэд бүтцэд чиглэсэн хөрөнгө оруулалт байв. Дата төв, тооцооллын хүчин чадал болон холбогдох дэд бүтцийн санхүүжилт жилд нэг орчим их наяд ам.долларт хүрч, цаашид нэмэгдэх төлөвтэй буй.

Гэвч технологийн компаниуд эдгээр хөрөнгө оруулалтыг санхүүжүүлэхийн тулд бонд гаргаж, их хэмжээний өр босгож байгаа нь бусад төрлийн өрийн хэрэгслийн эрэлтэд нөлөөлөх эрсдэлтэй байгаа юм. Үүний зэрэгцээ хиймэл оюуны бүтээгдэхүүн, үйлчилгээний орлого, хөрөнгө оруулалтын өгөөж нь өсөн нэмэгдэж буй санхүүжилтийн зардлыг нөхөж чадах эсэх асуудал асуулт хэвээр байна.

Тухайлбал, хиймэл оюуны компаниудад тооцооллын хүчин чадал түрээслүүлдэг “CoreWeave” компанийн зээлийн өртөг аравдугаар сарын эхээр 15 хувьд хүрсэн. Санхүүжилтийн ийм өндөр өртөг нь компанийн хөрөнгө оруулалтын өгөөжөөс давж байгаа тул өр төлбөрөө барагдуулах чадавхад эргэлзээ үүссэн байна.

Мөн “The Wall Street Journal”-ийн мэдээлснээр хиймэл оюуны “Anthropic” компанийн IPO-ийн баримт бичгийн төсөлд оны эхний хагас жилийн алдагдал бараг 81 тэрбум ам.доллар хүрсээн талаар дурджээ. Харин “Meta” компани гуравдугаар улиралд бий болгосон мөнгөн урсгалаасаа хоёр тэрбум ам.долларын өндөр зарлага гаргасан тухай мэдээллсний дараа хувьцааны ханш нь 7 хувиар буурсан байна.

Эдгээр үзүүлэлт нь хиймэл оюуны компаниудын хөрөнгө оруулалт богино хугацаанд ашигтай ажиллах эсэхээс гадна өндөр өртэй бизнесийн загварууд урт хугацаанд тогтвортой байх боломжтой эсэх асуудлыг хөндөж буй.

Технологийн хувьцааны ханшийн уналт эдийн засагт хэрхэн нөлөөлөх вэ? Хиймэл оюуны салбарын санхүүжилтийн эрсдэл нэмэгдэхтэй зэрэгцэн АНУ-ын технологийн Nasdaq индекс өнгөрсөн хоёр долоо хоногийн хугацаанд зургаан хувиар буурчээ.

АНУ-ын “RSM” байгууллагын ахлах эдийн засагч Жо Брусюлас зах зээлд үүссэн хэлбэлзлийг хөөсрөлтийн шинж тэмдэгтэй төстэй гэж тодорхойлсон байна. Түүнчлэн технологийн компаниуд хоорондоо хөрөнгө оруулалт, санхүүжилтийн өргөн холбоотой байгаа нь аль нэг компанийн санхүүгийн хүндрэл бусад оролцогч талд нөлөөлөх эрсдэлтэй байгаа аж.

Гэхдээ хиймэл оюуны салбарын хувьцааны ханшийн уналт АНУ-ын эдийн засгийг бүхэлд нь агшаана гэсэн үг биш болохыг Жеймс Райли онцолжээ. Өмнөх жилүүдэд АНУ-ын эдийн засгийн зарим салбар агшиж байхад бусад салбарын өсөлт нийт эдийн засгийг дэмжиж байсан тул технологийн салбарын хүндрэл ижил үр дагаварт хүрэх эсэх нь тодорхойгүй хэвээр байна.

Хөрөнгө оруулагчдын хувьд цаашдын гол асуудал нь хиймэл оюуны үйлчилгээний эрэлт өсөх эсэхээс гадна уг өсөлт технологийн компаниудын өрийн зардал, дэд бүтцийн хөрөнгө оруулалтыг нөхөх хэмжээний мөнгөн урсгал бий болгож чадах эсэх юм.