Нээлттэй ажлын байрны зар хүлээлгүйгээр шууд ажилд орсон 20 настай залуу туршлагаа хуваалцжээ

Пакистаны хөдөө нутагт өссөн 20 настай Ибрахим Нүүн АНУ-ын технологийн гарааны бизнесүүдэд хөрөнгө оруулдаг “Forerunner” компанид хөрөнгө оруулалтын ажилтнаар ажилд орсон туршлагаа “Business Insider” хэвлэлд хуваалцжээ. Тэрбээр ажлын байрны бүртгэл аль хэдийн зогссон байсан ч компанид шууд хандаж, өөрийн ур чадвар, мэргэжлийн харилцаа холбоо болон хөрөнгө оруулалтын санаагаа танилцуулснаар сонгон шалгаруулалтад оролцсон байна.

Ибрахим Нүүн 17 настайдаа АНУ-ын Калифорнийн их сургуулийн Беркли салбарт эдийн засаг, өгөгдлийн шинжлэх ухааны чиглэлээр суралцахаар иржээ. Суралцах хугацаандаа “KPMG” компанийн нүүрстөрөгчийн зах зээлийн чиглэлд, Майамигийн брокерын байгууллагад болон “Morgan Stanley” банкны Нью-Йорк дахь борлуулалтын багт дадлага хийсэн байна.

Мөн хоёр гарааны бизнесийн бүтээгдэхүүнийг эхнээс нь хөгжүүлэхэд оролцож, хэрэглэгчдийн хэрэгцээг судлах, бизнесийн санааг бодит бүтээгдэхүүн болгох туршлага хуримтлуулжээ. Хэдийгээр эдгээр бизнесийг урт хугацаанд үргэлжлүүлээгүй ч хөрөнгө оруулагчдын үйл ажиллагааг сонирхох болсон нь түүний карьерын чиглэлийг өөрчилсөн байна.

Бүртгэл хаагдсан ч өөрийн хөрөнгө оруулалтын судалгааг илгээжээ Ибрахим Нүүн 2026 оны тавдугаар сард их сургуулиа төгсөхдөө “Morgan Stanley” банкнаас эргэн ажиллах санал хүлээн авсан бөгөөд наймдугаар сард ажлаа эхлүүлэхээр төлөвлөж байжээ.

Гэвч долдугаар сарын дундуур технологийн венчур хөрөнгө оруулалтын “Forerunner” компани хөрөнгө оруулалтын ажилтан хайж байсныг олж мэдсэн байна. Тухайн үед ажилд авах бүртгэл хоёр сар гаруйн өмнөөс зогссон байсан ч тэрбээр компанид хандахаар шийджээ.

Ингэхдээ “Forerunner”-ийн цахим хуудас болон нийтэлсэн хөрөнгө оруулалтын материалуудыг судалж, хэрэглэгчдэд зориулсан хиймэл оюуны бүтээгдэхүүний зах зээлийн талаар нэг хуудас хөрөнгө оруулалтын дүгнэлт боловсруулсан байна. Үүндээ бүтэн нэг өдөр зарцуулсан бөгөөд цахим захидал, анкет, судалгаагаа хиймэл оюуны тусламжгүйгээр өөрөө бэлтгэсэн гэжээ.

Улмаар компанийн хөрөнгө оруулалтын багтай ярилцлага хийж, дараагийн шатанд өөрийн мэргэжлийн харилцаа холбооны сүлжээг компанийн хөрөнгө оруулалтын боломжтой холбон тайлбарлах даалгавар гүйцэтгэсэн байна.

6,000 LinkedIn холбооноос илүү харилцааны чанар чухал Ибрахим Нүүн их сургуульд суралцах хугацаандаа хөрөнгө оруулагчид болон гарааны бизнес эрхлэгчдийн хооронд холбоо тогтоож эхэлжээ. Тухайлбал, “Afore Capital” компанийн хөрөнгө оруулагчдад их сургуулийн клуб, хичээлээр дамжуулан танилцсан гарааны бизнесийн үүсгэн байгуулагчдыг санал болгодог байв.

Энэхүү туршлага нь “Forerunner”-ийн ярилцлагын үеэр давуу тал болсон гэж тэрбээр үзжээ. Учир нь түүний танилцуулсан хөрөнгө оруулалтын санаа нь ирээдүйд компани байгуулах боломжтой залуу мэргэжилтнүүдтэй бизнесээ эхлүүлэхээс нь өмнө харилцаа тогтоох тухай байв.

Тэрбээр “LinkedIn” платформд 6,000 орчим холбоотой боловч тэдгээр хүн бүрээс тусламж хүсэх боломжтой гэсэн үг биш гэдгийг онцолсон байна. Түүний хувьд харилцааны тооноос илүү итгэлцэл, тогтмол холбоо, харилцан үнэ цэн бүтээх боломж чухал аж. Ажил хайж буй залууст ямар зөвлөгөө өгсөн бэ? Ибрахим Нүүн салбарын арга хэмжээ, хакатон, томоохон чуулга уулзалтад оролцож, шинэ хүмүүстэй өөрийгөө танилцуулахыг зөвлөжээ. Тэрбээр ийм арга хэмжээнд танилцсан хүмүүстэй хурдан холбоо тогтоохын тулд “LinkedIn” профайлынхаа QR кодыг гар утасныхаа түгжээтэй дэлгэцэнд байрлуулдаг байна.

Мөн “Morgan Stanley”-д дадлага хийхдээ өдөрт 250 хүртэлх танилцах, харилцаа эхлүүлэх зорилготой зурвас илгээдэг байсан ч ихэнхэд нь хариу ирдэггүй байсныг дурджээ. Гэсэн ч татгалзах эсвэл хариу өгөхгүй байх вий гэсэн айдсаас болж боломжоо хязгаарлахгүй байхыг зөвлөсөн байна.

Түүний туршлага венчур хөрөнгө оруулалтын салбарын ажилд авах онцлогтой мөн нийцэж байгаа юм. Йелийн их сургуулийн карьерын төвийн мэдээлснээр гарааны бизнес болон венчур хөрөнгө оруулалтын байгууллагуудын ажилд авах үйл явц уламжлалт томоохон компаниудтай харьцуулахад тогтсон бүтэц багатай бөгөөд мэргэжлийн танилын хүрээ, шууд харилцаа чухал үүрэг гүйцэтгэдэг аж.

Ийнхүү Ибрахим Нүүний туршлага ажилд орох боломжийг зөвхөн нээлттэй ажлын байрны зар тодорхойлдоггүйг харуулж байна. Гэхдээ түүний амжилт зөвхөн санаачилгатай байснаас бус, өмнө нь хуримтлуулсан ажлын туршлага, хөрөнгө оруулалтын судалгаа болон мэргэжлийн харилцаа холбоотой холбоотой юм.