“Нийтийн тээврийн тоог нэмэгдүүлснээр автобус хүлээх хугацаа 5 минутаар буурсан”
Нийслэлийн нийтийн тээврийн 137 чиглэлд 1,185 автобус үйлчилж, 2026 оны эхний гурван улиралд нийт 134.3 сая зорчилт бүртгэгджээ.

Нийслэлийн нийтийн тээврийн үйлчилгээний хүртээмжийг сайжруулахаар автобусны тоог нэмэгдүүлж, чиглэлүүдийн хөдөлгөөнд зохицуулалт хийж байгаа ч иргэд оройн оргил цагаар автобус хүлээж зогссон хэвээр байна. Одоогоор нийтийн тээврийн 137 чиглэлд 1,185 автобус үйлчилж, өдөрт дунджаар 650 мянган зорчигч тээвэрлэж байгаа бөгөөд энэ оны эхний гурван улиралд 134.3 сая зорчилт бүртгэгджээ.
Нийтийн тээврийн бодлогын газрын даргын танилцуулснаар зорчигчдын ачаалал ихтэй 10 чиглэлд 20 автобус нэмж ажиллуулсан байна. Үүний дараа зорчигч урсгал зургаан хувиар өсч, автобус хүлээх хугацаа таван минутаар, иргэдээс ирүүлсэн санал гомдол есөн хувиар буурсан гэж мэдээлжээ. Түүнчлэн аравдугаар сард 105 чиглэлийн 189 автобусанд богино эргэлтийн зохицуулалт хийсэн байна.
Үүний зэрэгцээ хүртээмж багатай 16 суурьшлын бүсийг судалсны үндсэн дээр зургаан шинэ чиглэл нээх, таван чиглэлд дунд багтаамжийн автобус явуулах, дөрвөн чиглэлийн гаралтыг нэмэгдүүлэхээр төлөвлөжээ. Энэ хүрээнд нийт 46 автобус хуваарилна.
Мөн автобусны парк шинэчлэлийн хүрээнд их багтаамжийн 60 цахилгаан автобус, дунд багтаамжийн 46 автобус, сургуулийн 50 автобусыг үйлчилгээнд гаргахаар төлөвлөжээ. Ингэснээр сургуулийн автобусаар өдөрт тээвэрлэх сурагчдын тоог 5,000-аас 9,000 хүргэх хүлээлттэй байгаа юм.
Шинэ мэдээг цахим шуудангаар авах бол бүртгүүлнэ үү.
Холбоотой мэдээ





