Трамп хиймэл оюуны бодлогыг уялдуулах “Супер оюуны хүчин” байгууллаа

АНУ-ын Ерөнхийлөгч Дональд Трамп ням гарагт хиймэл оюуны хөгжлийн талаарх холбооны засгийн газрын бодлого, оролцоог нэгтгэн зохицуулах “Super Intelligence Force” буюу “Супер оюуны хүчин”-ийг байгуулснаа зарлалаа. Тус байгууллагыг Үндэсний тагнуулын албаны дарга Жэй Клэйтон тэргүүлэхээр болжээ.

Трамп есдүгээр сард “AI Force” байгуулахаар төлөвлөж буйгаа мэдэгдэж, удирдлагыг нь хариуцах албан тушаалтныг томилно гэдгээ мэдэгдээд байсан юм. Үүний дараа Трамп Холбооны засгийн газрын албан хэрэглээнд “artificial intelligence” буюу хиймэл оюун гэсэн нэршлийг “super Intelligence” буюу "супер оюун" болгон өөрчлөх чиглэл өгсөн бөгөөд шинэ байгууллагыг “Super Intelligence Force” гэж нэрлэжээ.

Трамп "Truth Social" платформд нийтэлсэн мэдэгдэлдээ тус хүчний зорилгыг АНУ-ыг супер оюуны технологийн салбарт дэлхийд тэргүүлэгч хэвээр байлгахын тулд Холбооны засгийн газрын үйл ажиллагааг уялдуулах гэж тодорхойлсон байна. Тэрбээр уг технологийн хөгжлийг аж үйлдвэрийн хувьсгал болон интернэт бий болсонтой дүйцэх хэмжээний томоохон өөрчлөлт авчирч магадгүй гэж үнэлээд байгаа юм.

Засгийн газар, технологийн салбарын уялдааг хариуцна

“Супер оюуны хүчин”-ийг Жэй Клэйтоноос гадна Холбооны худалдааны комиссын дарга Эндрю Фергюсон, Пентагоны технологийн асуудал хариуцсан Эмил Майкл болон Холбооны боловсон хүчний удирдлагын газрын дарга Скотт Купор нар удирдах юм. Багийн үйл ажиллагааг Трамп болон Цагаан ордны Тамгын газрын дарга Сүзи Уайлст шууд тайлагнана.

Шинэ бүтэц хэрэглэгчид, олон нийтийн эрх ашгийг хамгаалах болон шашны байгууллагууд, чухал дэд бүтцийн үйлчилгээ үзүүлэгчид, хиймэл оюуны компаниудтай Холбооны засгийн газрын харилцааг уялдуулах үүрэгтэй аж. Ингэснээр хиймэл оюуны хөгжлийг дэмжихийн зэрэгцээ технологийн аюулгүй байдал, олон нийтэд учирч болох эрсдэлийн талаарх засгийн газрын бодлогыг нэг төвөөс зохицуулах бүтэц бий болж буй.

Трамп шинэ бүтцийг зарлахаас өмнө технологийн “OpenAI”, “Anthropic”, “Google”, “Meta”, “Nvidia” зэрэг томоохон компанийн удирдлагуудтай Цагаан ордонд уулзсан. Уулзалтаар компаниуд хиймэл оюуны системийн дотоод хяналт, хөндлөнгийн аудит зэрэг аюулгүй ажиллагааны зарчмыг хэрэгжүүлэх сайн дурын тохиролцоонд нэгдсэн байна.