32 кг жинтэй сэжигтэй биет: Австралийн хэвлэл сум, Хятадын Элчин сайдын яам дарсны шил гэв

Папуа Шинэ Гвинейн нийслэл Порт-Морсби хотын барилгын талбайгаас 32 килограмм жинтэй сэжигтэй биет олдсонтой холбогдуулан БНХАУ-ын дөрвөн иргэнийг баривчилжээ.

Уг биетийг дэлбэрээгүй артиллерийн сум байж болзошгүй гэж Австралийн хэвлэл мэдээллийн байгууллага мэдээлсэн бол БНХАУ-ын дипломат төлөөлөгчийн газар үүнийг няцааж, сум хэлбэртэй дарсны шил хэмээн тайлбарласан байна.

Одоогоор уг биетийн гарал үүсэл, зориулалт болон тэсэрч дэлбэрэх аюултай эсэхийг тогтоосон албан ёсны эцсийн дүгнэлт гараагүй байна. Австралийн өргөн нэвтрүүлгийн корпораци буюу “ABC” нэрээ нууцалсан эх сурвалжид тулгуурлан Порт-Морсбигоос олдсон биетийг БНХАУ-д үйлдвэрлэсэн, дэлбэрээгүй 130 миллиметрийн 59 дүгээр загварын артиллерийн сум байж болзошгүй гэж мэдээлжээ. Харин БНХАУ-ын Элчин сайдын яам сэжигтэй биетийг цэргийн зориулалттай сум гэх мэдээллийг няцааж, сумтай төстэй хэлбэртэй боловч дарсны шил бөгөөд ямар ч аюулгүй гэж тайлбарласан

Австралийн хэвлэл мэдээллийн байгууллага болон Хятадын дипломат төлөөлөгчийн газрын тайлбар хоорондоо зөрж байна.

Цагдаагийн эцсийн дүгнэлт гараагүй байна

Папуа Шинэ Гвинейн цагдаагийн байгууллага уг хэрэгтэй холбогдуулан дөрвөн хятад иргэнийг баривчилсан байна.

Мөн цагдаагийн байгууллага өмнө нь сэжигтэй биетийг энгийн дуураймал загвар байсан гэх тайлбарыг няцааж байжээ.

Хэрэв уг биет дэлбэрээгүй артиллерийн сум болох нь батлагдвал хэрхэн, ямар зорилгоор барилгын талбайд авчирсан болон аюулгүй байдлын шаардлага зөрчигдсөн эсэхийг тодруулах шаардлагатай.

Харин БНХАУ-ын Элчин сайдын яамны тайлбар батлагдвал сэжигтэй биетийн талаар анх гарсан мэдээлэл яагаад зөрсөн, баривчилгаа ямар үндэслэлтэй байсныг тодруулах асуудал үүснэ.