9 настай хүүхэд аавынхаа картыг ашиглан “Roblox”-ийн бичлэгийн сурталчилгаанд $118,000 зарцуулжээ

Есөн настай хүүхэд өөрийн YouTube сувгийн “Minecraft”, “Roblox” тоглоомын бичлэгүүдийг сурталчлахдаа аавынхаа компанийн кредит картыг ашиглаж, 118 мянган ам.долларын зарлага гаргажээ.

Хүүхдийн аав, маркетингийн мэргэжилтэн Дэвид Саркисян энэ талаар өөрийн бичлэгээрээ хуваалцсан байна. Тэрбээр болсон явдлын дараа хүүгийнхээ “Mighty Mike Plays” YouTube сувгийг хааснаа мэдэгджээ.

20 ам.долларын сурталчилгаанаас эхэлжээ

Саркисяны ярьснаар хүүгийнх нь бичлэгүүд цөөн хандалт авч байсан тул сэтгэлээр унаж эхэлсэн аж. Тиймээс аав нь хүүдээ туслахаар нэг бичлэгийг нь сурталчлахад 20 орчим ам.доллар зарцуулжээ.

Гэхдээ сурталчилгаа үүсгэхдээ компанийн кредит картын мэдээллийг бүртгэлтэй хэвээр үлдээсэн байна. Ингэснээр хүү нь дараа нь тухайн төлбөрийн хэрэгсэлд хандаж, өөрийн бичлэгүүдээ сурталчлах боломжтой болжээ.

Зарлага $118 мянгад хүрчээ

“Economic Times”-ийн мэдээлснээр Саркисян компанийн удирдлага болон санхүүгийн багтайгаа уулзах үеэр зарлагын хэмжээг анх мэдсэн байна.

Компанийн сүүлийн гурван долоо хоногийн сурталчилгааны зардлыг шалгахад хүү нь тоглоомын бичлэгүүдээ сурталчлахад кредит картаас нийт 118 мянган ам.доллар зарцуулсан нь тогтоогджээ.

Сурталчилсан контентуудын дунд “Roblox”, “Minecraft” тоглоомын бичлэгүүд багтсан бөгөөд гурван бичлэг нийтдээ 200 мянга орчим хандалт авсан байна.

Саркисян болсон явдлын дараа хүүдээ ямар хариуцлага тооцохоо хараахан шийдээгүй гэжээ. Харин “Mighty Mike Plays” сувгийг хаасан байна.

Тэрбээр төлбөрийн мэдээллээ хүүхэд хандах боломжтой хэвээр үлдээсэн нь өөрийнх нь алдаа байсан гэж үзэж буйгаа мөн хэлжээ. Энэ тохиолдол хүүхдийн ашигладаг төхөөрөмж, бүртгэлд төлбөрийн мэдээлэл хадгалахтай холбоотой эрсдэлийг дахин анхаарлын төвд оруулж байна.