Авто зам ашигласны төлбөрийг хөнгөлж, хотын албан татварыг нэг хувь болгох асуудлыг хэлэлцэнэ

НИТХ-ын ээлжит IX хуралдааныг арваннэгдүгээр сарын 9-ний 10:00 цагт зохион байгуулахаар товложээ. Хуралдаанаар авто зам ашигласны төлбөрийн хөнгөлөлт, хотын албан татварын хувь хэмжээ болон нийслэлийн энэ оны төсвийн тодотгол зэрэг нийт 19 асуудлыг хэлэлцэхээр төлөвлөсөн байна.

Эдгээр асуудлыг хуралдаанаар хэлэлцүүлэх саналыг НИТХ-ын зөвлөлийн гишүүдийн олонх дэмжжээ.

Тэгш, сондгой дугаарын хязгаарлалтад хамрагдсан 14 хоногийн төлбөрийг хөнгөлөх үү?

НИТХ-ын 2024 оны 24/29 дүгээр тогтоолд нэмэлт оруулж, авто зам ашигласны төлбөрийн зохицуулалтыг өөрчлөх санал боловсруулсан байна.

Тодруулбал, эрх бүхий байгууллагын шийдвэрээр тээврийн хэрэгслийн хөдөлгөөнийг түр хязгаарласан тохиолдолд тухайн автомашин замын хөдөлгөөнд оролцоогүй өдрийн тоотой хувь тэнцүүлэн дараа жилийн авто зам ашигласны төлбөрөөс хөнгөлөлт тооцохоор тусгажээ.

Гэхдээ долоо хоног бүр тогтмол хэрэгждэг улсын дугаарын хязгаарлалт энэ зохицуулалтад хамаарахгүй юм.

Нийслэлд энэ оны найм, есдүгээр сард COP17 олон улсын хурал болон хичээлийн шинэ жилийн бэлтгэлтэй холбоотойгоор 28 хоног тээврийн хэрэгслийг улсын дугаарын тэгш, сондгойгоор ангилан хөдөлгөөнд оролцуулсан.

Энэ хугацаанд автомашин эзэмшигчид 14 хоног тээврийн хэрэгслээ ашиглах боломжгүй байсан тул тухайн хугацаанд ногдох төлбөрийг 2027 оны авто зам ашигласны төлбөрөөс хөнгөлөх санал гаргаад байна.

Хэрэв тогтоолын төсөл батлагдвал автомашин эзэмшигчдийн төлөх дараа жилийн зам ашигласны төлбөрт хөнгөлөлт тооцох эрх зүйн үндэс бүрдэх юм.

Хотын албан татварыг хоёр хувиас нэг хувь болгох санал гаргажээ

Хуралдаанаар нийслэлийн нутаг дэвсгэрт үзүүлдэг зургаан төрлийн үйлчилгээнд ногдуулах хотын албан татварын хувь хэмжээг бууруулах асуудлыг мөн хэлэлцэнэ.

Үүнд зочид буудал, амралтын газар, ресторан, баар, автомашин угаалга болон авто үйлчилгээ хамрагдаж байна.

Эдгээр үйлчилгээнд одоо мөрдөж буй хоёр хувийн татварыг нэг хувь болгон бууруулж, ирэх оны нэгдүгээр сарын 1-нээс хэрэгжүүлэх санал боловсруулжээ.

Тогтоолын төсөл батлагдвал дээрх үйлчилгээг авахад ногдох хотын албан татварын хувь хэмжээ хоёр дахин буурна. Гэхдээ үйлчилгээний эцсийн үнэ мөн хэмжээгээр буурах эсэх нь тухайн аж ахуйн нэгжийн үнийн бодлогоос хамаарна.

Төсвийн тодотголтой холбогдуулан оны эхний есөн сарын эдийн засгийн үзүүлэлтүүдийг танилцуулсан бөгөөд ДНБ-ий өсөлт 7.3 хувь, гадаад валютын албан нөөц 8.897 тэрбум ам.долларт хүрсэн тухай мэдээлсэн байна.