БНСУ-ын нарны эрчим хүчний хавтан үйлдвэрлэгч компаниудын хувьцааны ханш лхагва гарагийн арилжаагаар 8 гаруй хувиар өслөө

БНСУ-ын нарны эрчим хүчний салбарын “Hanwha Solutions”, “OCI Holdings” компанийн хувьцааны ханш лхагва гарагийн арилжаагаар 8 гаруй хувиар өслөө. АНУ-ын Ерөнхийлөгч Дональд Трамп болон БНХАУ-ын Төрийн тэргүүн Ши Жиньпин нарын уулзалтын өмнө Хятадын нарны эрчим хүчний бүтээгдэхүүнд тавьсан АНУ-ын худалдааны хязгаарлалт хөрөнгө оруулагчдын анхаарлыг татжээ.

Хоёр улсын удирдагч энэ долоо хоногт Вашингтонд уулзахаар товлосон бөгөөд худалдааны асуудал хэлэлцээний гол сэдвүүдийн нэг байх төлөвтэй байна.

БНСУ-ын үнэт цаасны “Hana Securities” компани АНУ уг уулзалтаар Хятадын нарны эрчим хүчний бүтээгдэхүүнд тавьсан хязгаарлалтаа сулруулах магадлал маш бага хэмээн үзжээ. Тус компанийн шинжээчид Вашингтон нарны эрчим хүчний салбарыг үндэсний аюулгүй байдалтай холбоотой стратегийн ач холбогдолтой үйлдвэрлэл хэмээн авч үзэж байгааг онцолсон байна.

“Hana Securities”-ийн шинжээч Юн Жэ Сон лхагва гарагт нийтэлсэн тайлбартаа “АНУ болон БНХАУ-ын Төрийн тэргүүн нарын дээд хэмжээний уулзалтаар Хятадын нарны бүтээгдэхүүнд тавьсан хязгаарлалтыг сулруулбал үндэсний аюулгүй байдлын стратегийн салбарын дотоодын нийлүүлэлтийн сүлжээ байгуулах бодлогоосоо ухарсантай адил болно”

Тэрбээр “Hanwha Solutions”, “OCI Holdings”-ийг тус салбарын онцлох компаниудаар нэрлэж, АНУ болон БНХАУ-ын уулзалтаас эдгээр компанид сөргөөр нөлөөлөх шийдвэр гарах магадлал бага гэж үзсэн байна.

Юн Жэ Соны тайлбарласнаар талууд тариф бууруулах асуудал хэлэлцвэл стратегийн бус бараа бүтээгдэхүүнд төвлөрөх төлөвтэй байгаа юм. Дональд Трамп наймдугаар сард үндэсний аюулгүй байдлын үндэслэлээр полисиликон болон түүний гаралтай бүтээгдэхүүнд Худалдааг өргөжүүлэх тухай хуулийн 232 дугаар зүйлд тулгуурласан арга хэмжээ авсныг мөн онцолжээ.

Нарны эрчим хүчний салбарын ач холбогдол хиймэл оюун, хагас дамжуулагчийн үйлдвэрлэлд шаардлагатай цахилгаан эрчим хүчнээс эхлээд батлан хамгаалах, сансрын салбар хүртэл өргөжиж буй тул Хятадын нийлүүлэлтээс хамаарлаа бууруулах нь Вашингтоны хувьд улам чухал болж байгааг шинжээч дурдсан байна. “Hanwha Solutions”-ийн нарны эрчим хүчний “Qcells” нэгж АНУ-ын Худалдааны яам болон Гааль, хил хамгаалах албанаас импортын нарны хавтанг их хэмжээгээр урьдчилан нөөцлөх явдлыг хязгаарлах чиглэлээр авч буй арга хэмжээг дэмжиж байгаагаа мэдэгдсэнээс хэдхэн цагийн дараа БНСУ-ын компаниудын хувьцааны ханш өсжээ.

Трампын засаг захиргаа полисиликон болон түүний гаралтай бүтээгдэхүүнд 232 дугаар зүйлд үндэслэсэн тариф хэрэгжүүлэхээр ажиллаж байгаа бөгөөд “Qcells”-ийн үзэж буйгаар шинэ арга хэмжээ нь импортлогчид АНУ-ын худалдааны бодлогыг тойрон гарахаас сэргийлж, дотоодын нарны эрчим хүчний үйлдвэрлэлийг дэмжих боломжтой юм_

“Гадаадын компаниуд АНУ-ын зах зээлд их хэмжээний импортын бүтээгдэхүүн нийлүүлэх аргыг Америкийн үйлдвэрлэгчдийн өрсөлдөх чадварыг сулруулахын тулд олон жилийн турш ашиглаж ирсэн” гэж “Qcells”-ийн Глобал гүйцэтгэх захирал Энди Парк мэдэгдэлдээ дурджээ.

Өөрийгөө АНУ дахь цахиурт суурилсан нарны эрчим хүчний хамгийн том үйлдвэрлэгч гэж тодорхойлдог “Qcells” Жоржиа муж дахь үйлдвэрлэлээ өргөжүүлэхэд 2.5 тэрбум ам.долларын хөрөнгө оруулалт хийсэн. Тус үйлдвэрт нарны зай болон хавтан үйлдвэрлэдэг.