Төрөөс авдаг 367 төрлийн зөвшөөрөлд татвар, НДШ-ийн өргүй байх шаардлагыг цуцалжээ

Засгийн газраас хэрэгжүүлж буй “Чөлөөлье” бодлогын хүрээнд 54 байгууллагаас олгодог 367 төрлийн зөвшөөрөлд татвар, нийгмийн даатгалын шимтгэлийн өргүй байх шаардлага тавихгүй байхаар цахим системд өөрчлөлт оруулжээ. Ингэснээр иргэн, аж ахуйн нэгжүүдийн зөвшөөрөл авахад бүрдүүлэх шаардлагыг цөөлөх нэг алхам хийсэн байна.

Энэ талаар аравдугаар сарын 27-нд Эдийн засаг, хөгжлийн яаманд болсон Зөвшөөрлийн зөвлөлийн хоёр дахь хуралдаанаар танилцуулжээ. Хуралдаанаар зөвлөлийн анхдугаар хуралдаанаас гаргасан зөвлөмжийн хэрэгжилтийг хэлэлцэж, зөвшөөрөл олгох үйл явцыг хялбаршуулах ажлын явцыг дүгнэсэн байна.

Тухайлбал, Зөвшөөрлийн зөвлөлийн ажиллах журмыг батлуулж, шаардлагагүй болсон 44 эрх зүйн актыг хүчингүй болгожээ. Мөн Зөвшөөрөл, мэдэгдлийн тухай хууль хэрэгжиж эхэлснээс хойш нийт 32,358 зөвшөөрөл олгосон талаар мэдээлэв.

Иргэн, аж ахуйн нэгжүүдэд зөвшөөрөл авахтай холбоотой зөвлөгөө өгөх, тулгамдсан асуудлыг шийдвэрлэхэд дэмжлэг үзүүлэх зорилгоор “Зөвшөөрлийн мэдээлэл, үйлчилгээний нэгдсэн төв”-ийг байгуулсан байна.

Эдийн засаг, хөгжлийн сайд, Зөвшөөрлийн зөвлөлийн даргын мэдээлснээр Засгийн газрын 2026 оны 329 дүгээр тогтоолын хүрээнд зөвшөөрлийн тогтолцоог шинэчлэх 36 арга хэмжээ хэрэгжүүлж байгаа аж. Үүнээс Зөвшөөрөл, мэдэгдлийн тухай хуулийн хэрэгжилттэй холбоотой 11 арга хэмжээний биелэлт 83 хувьтай байна.

Цаашид зөвшөөрлийн мэдээллээ цахим системд бүрэн оруулаагүй, зөвшөөрөл олгох үйлчилгээг цахимжуулаагүй эрх бүхий байгууллагуудын хэрэгжилтэд хяналт тавихаар болжээ. Мөн шаардлагатай тохиолдолд хариуцлага тооцох чиглэл өгсөн бөгөөд давхардсан, үр ашиггүй зохицуулалтыг цөөлж, төрийн байгууллагуудын уялдаа холбоог сайжруулах ажлыг үргэлжлүүлэхээр төлөвлөсөн байна.