Трампын засаг захиргаа В.Орбаныг НҮБ-ын тэргүүнд нэр дэвшүүлэхийг дэмжлээ

АНУ-ын Ерөнхийлөгч Дональд Трампын засаг захиргааны зарим албан тушаалтан Унгарын Ерөнхий сайд асан Виктор Орбаныг НҮБ-ын дараагийн Ерөнхий нарийн бичгийн даргад нэр дэвшүүлэхийг дэмжиж байгаа талаар “The Wall Street Journal” мэдээлжээ. Тус сонины мэдээлснээр Орбаныг АНУ, Орос, Хятадын хамтарсан дэмжлэгтэйгээр нэр дэвшүүлэх боломжийг хэлэлцэж байгаа ч албан ёсны шийдвэр гараагүй байна.

АНУ-ын Төрийн департаментын эх сурвалжийн мэдээлснээр уг санаа анх сонсоход "бодитой бус" мэт санагдаж болох ч Орос, Хятад дэмжих магадлалтай байгаа юм байна. Мөн НҮБ-ын Аюулгүйн зөвлөлийн хүрээнд АНУ, Орос, Хятад нэг байр суурьтай байвал зорилгодоо хүрэх боломж өндөр байдгийг онцолжээ.

Виктор Орбан өнгөрсөн дөрөвдүгээр сард болсон Унгарын парламентын сонгуульд ялагдаж, 16 жил үргэлжилсэн засаглал нь өндөрлөсөн юм. Гэсэн хэдий ч тэрбээр АНУ-ын Ерөнхийлөгч Дональд Трамп, ОХУ-ын Ерөнхийлөгч Владимир Путин, БНХАУ-ын дарга Ши Жиньпин нартай тогтоосон харилцаагаа хадгалсаар байгаа аж.

Гэхдээ ОХУ-ын Гадаад хэргийн дэд сайд Александр Алимов дээрх мэдээлэлтэй холбогдуулан АНУ, Орос, Хятадын аль нь ч Орбаныг нэр дэвшүүлэхгүй гэж мэдэгджээ. Тэрбээр “Интерфакс” агентлагт өгсөн тайлбартаа Аюулгүйн зөвлөлийн байнгын гишүүн орнууд Ерөнхий нарийн бичгийн даргад нэр дэвшигч санал болгодоггүйг дурдсан байна. Мөн Орбаныг нэр дэвшүүлэх тухай мэдээлэл үнэн бол уг санаачилгыг дэмжигчид өөр улс олох шаардлагатай гэжээ.

Польш, Украин улсууд ч Орбаныг НҮБ-ын удирдлагад томилох санааг эсэргүүцэв. Польшийн Гадаад хэргийн сайд Радослав Сикорски тус улс Орбаны нэр дэвшилтийг дэмжинэ гэж үзэхгүй байгаагаа илэрхийлсэн бол Украины Гадаад хэргийн сайд Андрей Сибига түүнийг Европын холбооны чухал шийдвэрүүдэд хориг тавьж, гацааж ирсэн туршлагаа НҮБ-д ашиглаж болзошгүй хэмээн шүүмжилжээ.

НҮБ-ын одоогийн Ерөнхий нарийн бичгийн дарга Антонио Гутеррешийн хоёр дахь таван жилийн бүрэн эрхийн хугацаа 2026 оны арванхоёрдугаар сарын 31-нд дуусна. Түүний залгамжлагчийг сонгох үйл явц аль хэдийн эхэлсэн бөгөөд шинэ Ерөнхий нарийн бичгийн дарга 2027 оны нэгдүгээр сарын 1-нээс үүрэгт ажилдаа орох ёстой.

НҮБ-ын дүрмийн 97 дугаар зүйлд зааснаар Ерөнхий нарийн бичгийн даргыг Аюулгүйн зөвлөлийн зөвлөмжид үндэслэн Ерөнхий Ассамблей томилдог. Аюулгүйн зөвлөлийн 15 гишүүний дор хаяж ес нь нэр дэвшигчийг дэмжих шаардлагатай бөгөөд АНУ, Орос, Хятад, Франц, Их Британи гэсэн байнгын таван гишүүний аль нэг нь хориг тавибал нэр дэвшигчийг томилох боломжгүй юм.