Женсен Хуан хувийн амьдралтай нь холбоотой дуулианы дараа ажилтнуудаасаа дахин уучлал хүсчээ

АНУ-ын чип үйлдвэрлэгч “Nvidia” компанийн гүйцэтгэх захирал Женсен Хуан гэр бүлээс гадуурх харилцаатай байснаа олон нийтэд мэдэгдсэний дараа Калифорни мужийн Санта Клара хот дахь компанийн төв байранд ажлаа хэвийн үргэлжлүүлж байна.

Тэрбээр арваннэгдүгээр сарын 9-ний даваа гарагт удирдах албан тушаалтнуудтай хийсэн ээлжит уулзалтын эхэнд хувийн амьдралтай холбоотой асуудлаа хөндөж, ажилтнуудаасаа уучлал хүссэн талаар ойрын эх сурвалжууд CNBC агентлагт мэдээлжээ.

Эх сурвалжуудын мэдээлснээр Женсен Хуан уулзалтын үеэр ажилтнуудын асуултад хариулаагүй бөгөөд удалгүй компанийн өдөр тутмын үйл ажиллагаа, бизнесийн асуудлуудыг хэлэлцсэн байна. Мөн тэрбээр мягмар гарагт ажилдаа ирж, компанийн санхүүгийн гуравдугаар улирлын тайлан танилцуулагдахаас долоо хоногийн өмнө төлөвлөсөн уулзалтуудаа үргэлжлүүлжээ.

Өдгөө 63 настай Женсен Хуан арваннэгдүгээр сарын 8-нд ажилтнууддаа илгээсэн цахим захидалдаа гэр бүлээс гадуурх харилцаатай байснаа хүлээн зөвшөөрсөн ч тухайн хүний нэрийг дурдаагүй байна. Тэрбээр захидалдаа уучлалт хүсээд ч гаргасан үйлдлээ өөрчилж чадахгүйгээ ойлгож буйгаа илэрхийлж, гэр бүлийн харилцаагаа сэргээн, ажилтнуудынхаа итгэлийг дахин олж авахыг хүсэж буйгаа бичсэн аж.

Үүний зэрэгцээ “Financial Times” хэвлэлийн мэдээлснээр Женсен Хуан “Megaspeed” компанийн удирдах албан тушаал хашиж байсан Алис Хуан хэмээх эмэгтэйтэй хувийн харилцаатай байжээ. Уг эмэгтэйг АНУ-ын Холбооны мөрдөх товчоо БНХАУ-ын тагнуул байж болзошгүй хэмээн сэжиглэж буй.

“Nvidia”-ийн Төлөөлөн удирдах зөвлөл уг асуудлаар бие даасан мөрдөн шалгалт эхлүүлж, арваннэгдүгээр сарын 10-нд АНУ-ын хуулийн “Wachtell, Lipton, Rosen & Katz” фирмийг шалгалт явуулахаар хөлсөлжээ. CNBC-ийн мэдээлснээр компанийн дотоод уур амьсгал өөрчлөгдөж, зарим ажилтан гүйцэтгэх захирлынхаа мэдэгдэлд цочирдсон байна. Женсен Хуаныг олон жилийн турш үлгэр дуурайлал гэж үзэж ирсэн ажилтнуудын хувьд уг үйл явдал итгэл алдрах шалтгаан болсныг эх сурвалжууд онцолжээ.

Женсен Хуан анх 1993 онд “Nvidia” компанийг хамтран үүсгэн байгуулсан бөгөөд тус компани видео тоглоомын график боловсруулах чип үйлдвэрлэгчээс хиймэл оюуны технологийн дэд бүтцийн гол нийлүүлэгчдийн нэг болон өргөжсөн юм. Тэрбээр АНУ-ын технологийн бодлогын хэлэлцүүлэгт идэвхтэй оролцож, Ерөнхийлөгч Дональд Трампын тавдугаар сард Хятадад хийсэн айлчлалд бизнес төлөөлөгчдийн нэгээр оролцож байв.

Мөн есдүгээр сард Цагаан ордонд зохион байгуулсан төрийн хүндэтгэлийн зоогийн үеэр Женсен Хуан эхнэрийн хамт Хятадын Төрийн тэргүүн Ши Жиньпинтэй нэг ширээнд суусан байна. Түүний хувийн харилцаатай холбоотой дуулиан өрнөсөн нь Хятадад хиймэл оюуны чипийн борлуулалтыг нэмэгдүүлэхийг дэмждэг байр суурь болон тус улстай тогтоосон харилцааг нь дахин анхаарлын төвд оруулжээ.