Жим Крамер технологийн салбарт хөрөнгө оруулахаас өмнө өсөлтийн мөчлөгт анхаарахыг зөвлөлөө

АНУ-ын технологийн салбарын хувьцааны өсөлтийг сүүлийн жилүүдэд тэргүүлсэн “Nvidia”, “Microsoft”, “Alphabet”, “Meta” компаниудын ханш сүүлийн хэдэн долоо хоногт тогтвортой өсөлт үзүүлж чадахгүй байгаа ч салбарын бусад компанийн хувьцаанд өсөх хандлага ажиглагдаж эхэлжээ.

Тухайлбал, хагас дамжуулагч үйлдвэрлэгч “Broadcom”, санах ойн чип үйлдвэрлэгч “Micron” компаниудын хувьцааны ханш мягмар гарагийн арилжаагаар өсөлт үзүүлснээр Уолл Стрийт гол төлөв өсөлттэй хаагдлаа.

CNBC-ийн “Mad Money” нэвтрүүлгийн хөтлөгч Жим Крамерын үзэж буйгаар технологийн салбарын өсөлт сэргэх шинж тэмдэг ажиглагдаж байгаа ч өмнөх жилүүдийн өсөлтийг тэргүүлсэн компаниуд бус, өөр компаниуд голлох үүрэг гүйцэтгэж магадгүй байна.

Тэрбээр мягмар гарагийн арилжаа хаагдсаны дараа гуравдугаар улиралд санхүүгийн гүйцэтгэл нь "дажгүй үр дүн"-тэй гарсан чип үйлдвэрлэгч “Advanced Micro Devices”, сүлжээний тоног төхөөрөмжийн “Arista Networks” компаниудыг онцолжээ. Мөн программ хангамж, үүлэн технологийн “Oracle” компанийн хувьцааны ханш тухайн өдрийн арилжаагаар 6 орчим хувиар өссөн байна.

Крамер мөн эдгээр компанийн гүйцэтгэл нь технологийн салбарын өсөлт цөөн тооны томоохон компаниас хамаарахгүйгээр үргэлжлэх боломжтойг харуулж байгаа ч нэг өдрийн эерэг үзүүлэлтэд тулгуурлан хэт өөдрөг дүгнэлт хийхээс болгоомжлох хэрэгтэй гэж үзжээ.

Дата төвийн бүтээн байгуулалт шинэ эрсдэл дагуулж байна Технологийн компаниудын өсөлтөд нөлөөлж болзошгүй нэг хүчин зүйл нь АНУ-ын зарим орон нутагт дата төвийн бүтээн байгуулалтыг эсэргүүцэх хандлага нэмэгдэж буй. Иргэд дата төвүүдийн цахилгаан эрчим хүчний өндөр хэрэглээ нь төлбөрийг нэмэгдүүлж, хөргөлтийн системд ашиглах усны хэрэглээ орон нутгийн нөөцөд нөлөөлж болзошгүй хэмээн болгоомжилж байгаа аж.

Крамерын тайлбарласнаар дата төвийн төсөл цуцлагдаж, эсвэл өөр байршилд шилжих шаардлагатай болбол “Iren”, “Nebius”, “CoreWeave” зэрэг харьцангуй жижиг хөгжүүлэгч илүү өндөр эрсдэлтэй тулгарч магадгүй аж. Харин “Amazon” зэрэг санхүүгийн болон үйл ажиллагааны илүү арвин нөөцтэй компаниуд дата төвөө хөгжүүлэхээр өөр байршил сонгох боломжтой юм.

Ираны дайн хөрөнгийн зах зээлийн тодорхойгүй байдлыг нэмэгдүүлсээр байна Үүний зэрэгцээ технологийн салбарын сэргэлтэд нөлөөлөх өөр нэг хүчин зүйл нь Ирантай холбоотой үргэлжилж буй дайн юм. Мягмар гарагт АНУ, Ираны хэлэлцээ урагшлах боломжтой гэсэн хүлээлтийн улмаар газрын тосны ханш буурсан ч Крамер мөргөлдөөн дахин хурцдах эрсдэлийг хөрөнгө оруулагчид дутуу үнэлсээр ирснийг анхааруулжээ.

Түүний үзэж буйгаар газрын тосны ханшийн нэг өдрийн бууралт нь геополитикийн эрсдэл арилсныг нотлохгүй. Иймээс технологийн хувьцааны ханш тогтвортой сэргэж эхэлсэн гэж дүгнэхэд хангалттай үндэслэл бүрдээгүй байна.

Мөн сүүлийн саруудад технологийн хувьцааны ханш хэд хэдэн удаа сэргэх оролдлого хийсэн ч өсөлт нь тогтвортой үргэлжлээгүйг Крамер сануулав. Тиймээс тэрбээр тус салбарт их хэмжээний хөрөнгө дахин оруулахаасаа өмнө зах зээлийн өсөлт, уналтын мөчлөгт сайтар анхаарал хандуулахыг зөвлөлөө