АНУ завсрын сонгуулийн өмнө Иранд цохилт өгч магадгүй: Газрын тосны ханш өссөөр байна

Ойрх Дорнодын хурцадмал байдлын улмаас газрын тосны нийлүүлэлт тасалдах эрсдэл улам нэмэгдэж,байгаа энэ үед газрын тосны ханш өсөлт үзүүллээ. АНУ ойрын хэдэн долоо хоногт Иранд томоохон хэмжээний цэргийн ажиллагаа дахин эхлүүлэх боломжийг хэлэлцэж байгаа талаар “NBC News” эх сурвалжуудын мэдээлэлд тулгуурлан уламжилжээ.

Олон улсын жишиг “Brent” төрлийн газрын тосны арванхоёрдугаар сард нийлүүлэх фьючерс пүрэв гарагийн арилжаагаар 1.36 хувиар өсч, баррель тутамдаа 101.54 ам.долларт хүрсэн байна. Харин АНУ-ын WTI төрлийн газрын тосны арваннэгдүгээр сарын фьючерс 1.04 хувиар нэмэгдэж, баррель тутамдаа 89.32 ам.долларт тогтов.

АНУ-ын Ерөнхийлөгч Дональд Трамп болон тус улсын үндэсний аюулгүй байдлын албаныхан Иранд томоохон хэмжээний цэргийн ажиллагаа дахин эхлүүлэх боломжийн талаар хэлэлцсэн бөгөөд хувилбаруудын дунд ирэх сарын завсрын сонгуулиас өмнө цохилт өгөх боломж ч багтаж байгааг “NBC News” мэдээлжээ. Үүнтэй зэрэгцэн Ираны дэмжлэгтэй Хусит бүлэглэл Саудын Арабын нисэх буудлуудыг онилж буй бол Тегеран Ормузын хоолойд газрын тос тээвэрлэгч хөлөг онгоцнуудад халдаж байгаа нь бүс нутгийн эрсдэлийг нэмэгдүүлж байна. Цахим арилжааны “Exness” платформын санхүүгийн зах зээлийн зөвлөх Инки Чо газрын тосны ханшийн цаашдын чиглэл Персийн булангийн экспортын зам болон эрчим хүчний дэд бүтцийн аюулгүй байдлаас ихээхэн хамаарна гэдгийг онцоллоо. Түүний хэлснээр Ормузын хоолойн тээвэрлэлт эсвэл Саудын Арабын эрчим хүчний дэд бүтцэд нөлөөлөхүйц хурцадмал байдал даамжирвал газрын тосны бодит нийлүүлэлт тасалдах эрсдэл нэмэгдэж, улмаар ханш улам хөөрөгдөж болзошгүй юм