Японы хэрэглэгчид үнийн өсөлтөөс үүдэн гэртээ хооллох нь нэмэгджээ

Японд хүнсний үнэ өсч байгаа нь хэрэглэгчдийн хооллох зуршлыг өөрчилж, иргэд зардлаа хэмнэхийн тулд гадуур хооллохоос илүү гэртээ зоог барихыг сонгох болжээ.

Гал тогооны цахилгаан хэрэгсэл үйлдвэрлэгч “Tiger Corporation” зургадугаар сарын сүүлээр 20 болон түүнээс дээш насны 658 хүнээс судалгаа авахад оролцогчдын 90.4 хувь нь сүүлийн жилүүдэд хүнсэнд зарцуулах мөнгө нь нэмэгдсэн гэж хариулсан байна.

Мөн судалгаанд оролцогчдын 62.1 хувь нь гадуур хооллох нь багассан хэмээ хариулсан ба үүний гол шалтгаан нь үнийн өсөлт байв. Түүнчлэн хооллох зуршлаа өөрчилсөн хүмүүсийн 65.3 хувь нь зардлаа хэмнэхийн тулд гадуур хооллохоо багасгасан гэжээ.

Үүний зэрэгцээ гэртээ хооллохдоо юуг хамгийн их чухалчилж байгааг асуухад 45.4 хувь нь гадуур хооллосноос бага зардлаар хооллох боломжийг нэрлэсэн байна. Мөн 36.8 хувь нь цаг, ажиллагаа бага шаарддаг гэж үзэж буй бол 34.7 хувь нь шим тэжээлийн зохистой харьцааг чухалчилжээ.

Өөр нэг сонирхолтой зүйл нь хэрэглэгчид зардлаа хэмнэхийн зэрэгцээ гэртээ хийсэн хоолныхоо чанарыг сайжруулахад мөнгө зарцуулах сонирхолтой байна. Тодруулбал, гал тогооны цахилгаан хэрэгсэл шинээр авах хүсэлтэй 346 оролцогчийн 54.9 хувь нь будаа агшаагч худалдан авахаар төлөвлөж буй бол, 44.2 хувь нь богино долгионы зуух авахаар сонирхож буйгаа илэрхийлжээ.