"Disney+" 2027 оны "Super Bowl"-ийг дамжуулж, спортын контентоо өргөжүүлнэ

"Disney" компани ирэх оны хоёрдугаар сард болох "Super Bowl"-ийг "Disney+" платформоор дамжуулахаа лхагва гарагт зарлалаа. Ийнхүү АНУ дахь бүх "Disney+" захиалагч америк хөлбөмбөг (NFL)-ийн аваргын тоглолтыг үзэх боломж бүрдэх нь.

Өмнө нь ESPN 2027 онд "Super Bowl"-ийн шууд дамжуулалтыг анх удаа дамжуулж, тоглолтыг ESPN болон ABC сувгаар цацна гэж мэдээлж байсан юм. Үүн дээр "Disney+" дамжуулалтын нэмэлт суваг болж байна.

"Super Bowl"-оос гадна аваргын тоглолтын өмнөх Monday Night Football тоглолтыг ч АНУ дахь бүх "Disney+" захиалагчдад хүртээмжтэй байх аж.

Спортын шууд дамжуулалтын хүрээгээ тэлж байна

"Disney+" платформоор "Super Bowl"-ийг дамжуулах шийдвэр нь спортын контентыг өргөжүүлэх дараагийн алхам болж байна. "Disney" наймдугаар сард "Formula E" уралдаануудыг энэ оны сүүлээс "Disney+" захиалагчид үзнэ хэмээн мэдэгдэж байсан юм.

"Super Bowl" нь үзэгчдийн тоо, сурталчилгаа, брэндийн нөлөөгөөр АНУ-ын спортын томоохон арга хэмжээнүүдийн нэгд тооцогддог. Тус тоглолтыг "Disney+" дээр нэмснээр компани спортын шууд контентоо илүү өргөн хүрээний хэрэглэгчдэд хүргэх боломж бүрдэж байна.

2027 оны "Super Bowl"-ийг ESPN, ABC болон "Disney+" дээр зэрэг хүргэхээр төлөвлөж байгаа нь "Disney"-ийн телевиз, стримингийн үйлчилгээнүүдийн уялдааг нэмэгдүүлж байна.

ESPN-ийн бэлтгэх дамжуулалтыг уламжлалт телевизийн үзэгчид болон "Disney+" захиалагчдад хүргэснээр компани нэг контентыг олон сувгаар түгээх юм.