“Chevron”: АНУ дизель түлшний экспортыг хориглох нь нийлүүлэлтийн эрсдэлийг нэмэгдүүлнэ

АНУ-ын газрын тосны “Chevron” компанийн гүйцэтгэх захирал Майк Вирт тус улсын Засгийн газар дизель түлшний экспортоо хориглох нь шатахууны нийлүүлэлтийг сайжруулахын оронд нөхцөл байдлыг улам хүндрүүлэх эрсдэлтэй гэдгийг мэдэгдлээ.

Тэрбээр лхагва гарагт CNBC-ийн “Squawk Box Europe” нэвтрүүлэгт өгсөн ярилцлагадаа АНУ дэлхийн зах зээлд эрчим хүчний найдвартай нийлүүлэгч байсаар ирснийг онцолж, хүнд үед нийлүүлэлтээ үргэлжлүүлэх эсэхэд холбоотон болон түнш орнуудын дунд эргэлзээ үүсгэх нь “оновчгүй алхам” болно хэмээжээ.

Түүний байр суурь Ираны дайны улмаас дэлхийн эрчим хүчний нийлүүлэлт тасалдах эрсдэл өндөр байгаа үед гарч байна. Ормузын хоолойгоор дэлхийн газрын тос болон шингэрүүлсэн байгалийн хийн нийлүүлэлтийн 20 орчим хувь дамждаг бөгөөд дайны улмаас тус бүсийн усан тээвэр ихээхэн доголджээ.

Сүүлийн үед Ойрх Дорнодоос нийлүүлэх газрын тосны хэмжээ нэмэгдэж, “Их долоо” бүлгийн гишүүн орнууд стратегийн нөөцөөсөө зах зээлд нийлүүлэлснээр хомсдолын болгоомжлол тодорхой хэмжээнд намжсан байна. Гэвч Саудын Араб болон Ираны дэмжлэгтэй Хуситууд харилцан довтолгоо хийж байгаа нь эрчим хүчний зах зээлийн тодорхойгүй байдлыг үргэлжлүүлж байна.

Трамп дизель түлшний татварыг түр хойшлуулав

АНУ-ын Ерөнхийлөгч Дональд Трамп дизель түлшний экспортыг хориглох боломжийг өмнө нь хэлэлцэж байсан ч “Их долоо” бүлгийн гишүүн орнууд дизель түлш болон газрын тосны стратегийн нөөцөө зах зээлд гаргахаар тохирсны дараа уг хувилбараас тодорхой хэмжээнд ухарчээ.

Үүний зэрэгцээ Трамп даваа гарагийн орой захирамж гаргаж, авто замын татвараас чөлөөлөгддөг улаан өнгийн дизель түлшийг ачаа тээвэр болон хөдөө аж ахуйн салбарт түр хугацаанд ашиглахыг зөвшөөрсөн. Мөн уг түлштэй холбоотой татвар төлөлтийг энэ оны эцэс хүртэл хойшлуулсан байна.

Улаан дизель түлшийг ердийн үед хөдөө аж ахуйн болон барилгын техник зэрэг нийтийн замаас гадуур ашигладаг машин механизмд хэрэглэдэг.

Газрын тосны нөөц буурчээ

Дэлхийн газрын тосны нөөц өвлийн улирлын өмнө хэр эмзэг түвшинд хүрсэн талаар асуухад Майк Вирт нөхцөл байдлыг “маш ноцтой” гэж тодорхойлов.

Түүний хэлснээр энэ оны эхэнд компаниудын арилжааны нөөц, улс орнуудын стратегийн нөөц болон далайд тээвэрлэгдэж байсан газрын тосны хэмжээ харьцангуй өндөр байжээ.

Харин сүүлийн хэдэн сарын хугацаанд компаниудын нөөц буурч, Засгийн газрууд стратегийн нөөцөөсөө зах зээлд нийлүүлсэн байна. Үүний зэрэгцээ АНУ болон Европын Холбооны хоригт байсан газрын тосны тодорхой хэсгийг нийлүүлэх боломж бүрджээ.

Вирт энэ талаар “Эдгээр нөөц бидэнд хугацаа хожих боломж олгосон ч одоо ихээхэн шавхагдсан' гэдгийг онцолж, "Нөөц мэдэгдэхүйц буурсан учраас эрчим хүчний систем шинэ доголдолд илүү эмзэг болсон” хэмээв.