Энэтхэг инфляцыг хазаарлахын тулд бодлогын репо хүүгээ 2023 оноос хойш анх удаа өсгөлөө

Энэтхэгийн нөөцийн банк лхагва гарагт бодлогын репо хүүгээ 0.25 хувиар өсгөж, 5.50 хувьд хүргэлээ. Ингэснээр тус банк 2023 оноос хойш анх удаа мөнгөний бодлогоо чангаруулж, сүүлийн саруудад эрчимжсэн инфляцыг тогтоох арга хэмжээ авч байна. Төв банкны шийдвэр “Reuters” агентлагийн санал асуулгад оролцсон эдийн засагчдын таамагтай дүйж буй ба цаашид мөнгөний бодлогын төлөвөө “тохируулгатай” чангатгахаар шийдвэрлэжээ. Үүний зэрэгцээ Энэтхэгийн нөөцийн банкны ерөнхийлөгч Санжай Малхотра лхагва гарагт бодлогын шийдвэрээ танилцуулахдаа дэлхийн эдийн засагт тулгарч буй сорилтуудын үед ч Энэтхэгийн ДНБ-ий өсөлт тогтвортой байгааг онцоллоо. Гэсэн хэдий ч инфляцын төлөв өнгөрсөн жилийнхтэй адил таатай биш байгааг нэмж дурдсан байна. Энэтхэгийн инфляц сүүлийн 10 сар дараалан өсч, улмаар наймдугаар сард 4.8 хувьд хүрсэн нь Төв банкны дунд хугацааны 4 хувийн зорилтыг давсан үзүүлэлт болсон. Төв банкны тооцоолсноор тус улсын хүнс болон эрчим хүчийг хасч тооцсон суурь инфляц 2027 оны гуравдугаар сараар дуусах санхүүгийн жилд 4.4 хувийн түвшинд тогтворжих бол, нийт инфляц 5.2 хувьтай гарахаар байгаа юм. Малхотра энэ талаар “Одоогийн нөхцөлд ойрын хугацаанд хүү бууруулах боломжгүй” гэдгийг онцолж, “Цаашдын бодлогын шийдвэрээр нэг бол бодлогын репо хүүг дахин өсгөнө эсвэл одоогийн түвшинд хадгална” хэмээжээ. “HSBC” болон “Goldman Sachs” банк Энэтхэгийн нөөцийн банк арванхоёрдугаар сард болох ээлжит хурлаараа бодлогын репо хүүг дахин өсгөнө гэж таамаглаж байна. “HSBC”-ийн үзэж буйгаар инфляц тогтвортой өсч буй үед Төв банк шаардлагатай тохиолдолд репо хүүгээ дахин нэмэгдүүлэх чадвартай гэдгээ зах зээлд харуулах нь чухал ажээ. Харин гаргасан шийдвэр нь зах зээлд хэт зөөлдвөл Энэтхэгийн гадаадын хөрөнгө оруулагчдыг татах чадвар сулрах эрсдэлтэй гэж тус банк тайлбарлалаа.

Эдийн засгийн өсөлтийн төлөвийг нэмэгдүүлжээ Хэдийгээр инфляцын эрсдэл нэмэгдэж байгаа ч Энэтхэгийн эдийн засгийн идэвхжил харьцангуй тогтвортой хэвээр байна. Иймээс Төв банк 2027 оны гуравдугаар сараар дуусах санхүүгийн жилийн эдийн засгийн өсөлтийн төлөвийг өмнөх түвшнээс 0.4 нэгж хувиар нэмэгдүүлж, 7.1 хувьд хүргэжээ. Гэхдээ геополитикийн хурцадмал байдал, худалдааны маргаан, санхүүгийн нөхцөл байдал болон олон улсын түүхий эдийн ханшаас улбаалан өсөлт саарч болзошгүйг анхааруулжээ. Энэтхэг шатахууны хэрэгцээнийхээ 85 орчим хувийг импортоор хангадаг тул Ираны дайнаас үүдсэн нийлүүлэлтийн тасалдал, эрчим хүчний үнийн өсөлтөд өндөр өртөмтгий орнуудын нэг хэвээр байна. Дайн эхлэхээс өмнө Ормузын хоолой тус улсын эрчим хүчний импортын гол маршрутын нэг байв. Үүний зэрэгцээ Эль-Ниньогийн цаг уурын үзэгдэл хүнсний үнийг өсгөх эрсдэл дагуулж байна. Дэлхийн банкны мэдээллээр Энэтхэгт зургаагаас наймдугаар сарын хооронд 1960 оноос хойших дөрөв дэх хамгийн хуурай үе тохиосон бөгөөд хур тунадасны хомсдол хүнсний нийлүүлэлт, үнэд нөлөөлөх боломжтой ажээ. Мөн Дэлхийн банк Энэтхэгийн эдийн засаг 2027 оны гуравдугаар сараар дуусах санхүүгийн жилд 7.1 хувиар өснө гэж тооцоолжээ. Өмнөх санхүүгийн жилд өсөлт 7.8 хувь байсан бөгөөд худалдаа, геополитикийн тодорхойгүй байдлыг үл харгалзан эдийн засгийн идэвхжил хүлээлтээс сайн байсан ч ирэх улирлуудад өсөлтийн хурд саарна гэж тус байгууллага үзэж байна. Энэтхэгийн эдийн засаг зургадугаар улиралд 7.8 хувиар тэлсэн нь хүлээлтээс давсан үзүүлэлт болсон юм.