Хөрөнгө оруулагчид Санаэ Такаичигийн Засгийн газраас бодлогын амлалт бус үр дүн хүлээж байна

Япон улсын Ерөнхий сайд Санаэ Такаичигийн засаг захиргаа өсөлтөд чиглэсэн, мөнгө хэвлэх бодлогоосоо татгалзаж буйгаа илэрхийлж эхэлсэн нь хөрөнгө оруулагчдын зүгээс бодит үр дүн шаардсан нөхцөл байдалд хүргээд байна. Инфляц болон бондын өгөөж өсөж байгаа энэ үед санхүүжилтийн тодорхой бус байдал нь хөгжингүй орнуудын дунд хамгийн өндөр буюу 7 их наяд ам.долларын өртэй Японы зах зээлд бондын шинэ уналтыг үүсгэж болзошгүй байна.

Зардлын дарамт ба санхүүжилтийн сорилт Такаичи цаашид Засгийн газрын шинээр гаргах бондын хэмжээг 40 их наяд иен буюу 253 тэрбум ам.долларт хязгаарлахаа амласан билээ. Гэсэн хэдий ч ирэх жилийн төсвийн зарцуулалтын хүсэлт түүхэн дээд хэмжээ буюу 143 их наяд иенд хүрч, хоёр жилийн хугацаатай борлуулалтын татварын хөнгөлөлт нь жил бүр 4 орчим их наяд иенийн зардал гаргахаар байна.

Засгийн газар татварын орлого болон төрийн сангуудын өсч буй нөөцийг ашиглах замаар энэхүү алдагдлыг нөхөхөөр төлөвлөж байгаа боловч энэ алхам нь зах зээлд их хэмжээний мөнгө нийлүүлж, инфляцын дарамтыг улам нэмэгдүүлж болзошгүйг шинжээчид анхааруулж байна.

"SBI Securities" компанийн бондын ахлах стратегич Эижи Докэ "Зах зээл бодлогын агуулгыг харж байгаа бөгөөд зөвхөн үгэнд итгэхгүй байна" гэдгийг онцолж, "Засаг захиргааны зүгээс хийж буй зүйл болон хөрөнгө оруулагчдын анхаарлаа хандуулж буй зүйл хоорондоо тэс өөр байна" гэдгийг цохон тэмдэглэжээ.

Бодлогын эргэлт ба зах зээлийн хүлээлт Өнгөрсөн оны 10 дугаар сард албан тушаалдаа орсноос хойш эдийн засгийг дэмжих зорилгоор зардлыг нэмэгдүүлэх амлалт өгч байсан Такаичигийн хувьд өсөн нэмэгдэж буй бондын өгөөж бодлогыг нь хязгаарлах гол хүчин зүйл болон хувиржээ. Тухайлбал, Японы Засгийн газрын 10 жилийн хугацаатай бондын өгөөж сүүлийн олон арван жилийн дээд түвшинд хүрсэн нь улс орны санхүүгийн байдал хүндэрч болзошгүй болсныг илтгэж байна.

Үүнтэй холбоотойгоор тус улсын Сангийн сайд Сацуки Катаяма тэргүүтэй албаны хүмүүс бодлогынхоо өнгө аясыг өөрчилж, зах зээлд итгэл төрүүлэх алхмуудыг хийж эхэлжээ. Тухайлбал, эдийн засгийн сайд Минору Киучи болон Японы Төв банкны бодлого тодорхойлогчид Абеномикс буюу мөнгөний зөөлөн бодлогын үе шат өндөрлөснийг зарлаж, хүүг өсгөх бодлогыг дэмжиж буйгаа илэрхийлээд байна.

Гэсэн хэдий ч Засгийн газар ирэх санхүүгийн жилийн төсвийг боловсруулах явцдаа өгсөн амлалтаа бодит ажил хэрэг болгож чадах эсэхэд хөрөнгө оруулагчдын анхаарал төвлөрч байна. Японы Төв банкны удирдах зөвлөлийн гишүүн асан Асахи Ногүчи "Гол зүйл бол үрэлгэн зарцуулалтыг танаж, Японыг санхүүгийн шинэчлэл хийхэд нухацтай хандаж байгааг зах зээлд ойлгуулах явдал юм" гэж дүгнэжээ.