Тэтгэвэрт гарсны дараа жаргалтай амьдрах нь мөнгөнөөс л шалтгаалах уу?

Тэтгэвэрт гарахад хангалттай мөнгө хуримтлуулах нь чухал боловч дансны үлдэгдэл дангаараа тухайн үеийн амьдралын чанарыг тодорхойлохгүй гэж АНУ-ын хөрөнгө оруулалтын зөвлөх “Capital Investment Advisors” компанийн санхүүгийн төлөвлөгч Вэс Мосс үзэж байна.

Мосс залуу зөвлөх байхдаа их хэмжээний хөрөнгө хуримтлуулсан боловч амьдралдаа ямар нэг зүйлээр дутаж буй мэт мэдрэмжтэй олон хүнтэй уулзаж байснаа дурджээ. Түүний үзэж буйгаар тэтгэвэрт гарахад санхүүгийн бэлтгэлээс гадна өдөр тутмын амьдралаа юугаар дүүргэх, ямар зорилготой байх, хэнтэй цагийг өнгөрүүлэхээ төлөвлөх шаардлагатай.

“CGK Research” болон “Capital Investment Advisors”-ийн хамтарсан өнгөрсөн оны судалгаагаар аз жаргалтай тэтгэврийн насныхан тав болон түүнээс олон “үндсэн сонирхол”-той байх нь түгээмэл ажиглагджээ. Моссын тайлбарласнаар, хобби, сайн дурын ажил болон бусад сонирхол нь чөлөөт цагийг өнгөрүүлэхээс гадна зорилго, нийгмийн харилцаа, өдөр тутмын хэмнэлийг бий болгодог.

1.25 сая ам.долларын хуримтлалыг хэрхэн тооцох вэ?

Амьдралын хэв маягийг төлөвлөхийн зэрэгцээ тэтгэвэрт гарахад шаардагдах хөрөнгөө бодитоор тооцох хэрэгтэйг Мосс онцолжээ.

Тэр хөрөнгийн багцаас жил бүр инфляцад тохируулан тодорхой хэмжээний мөнгө зарцуулахад ашигладаг “4 хувийн дүрэм”-ийг жишээ болгосон байна. Тухайлбал, тэтгэвэрт гарсны дараах жилд 100 мянган ам.долларын зардалтай бөгөөд Нийгмийн даатгалаас 50 мянган ам.долларын орлого авдаг хүн үлдсэн 50 мянган ам.долларыг хөрөнгө оруулалтын багцаасаа санхүүжүүлэх шаардлагатай.

Жилийн 50 мянган ам.долларыг 4 хувийн татан авалтын түвшинд тооцвол ойролцоогоор 1.25 сая ам.долларын хөрөнгө шаардлагатай гэсэн тооцоо гарна.

Харин хуримтлалаа хэдийд эхлүүлсэн нь зорилтот хэмжээнд хүрэхэд томоохон ялгаа үүсгэнэ. “CNBC Make It”-ийн нийлмэл хүүгийн тооцооллын жишээгээр 20 настай хүн жил бүр 2,500 ам.доллар хөрөнгө оруулж, жилийн дундаж өгөөж 8 хувь байвал 67 насандаа ойролцоогоор 1.22 сая ам.доллартай болох онолын боломжтой.

Хуримтлалаа 10 жилийн дараа эхлүүлбэл ижил хэмжээний хөрөнгө бүрдүүлэхийн тулд жил бүр ойролцоогоор 5,500 ам.доллар оруулах шаардлагатай болно. Өөрөөр хэлбэл, хуримтлалын хугацааг уртасгах нь нийлмэл өгөөжийн үр нөлөөг нэмэгдүүлж, жил бүр гаргах шаардлагатай мөнгөний хэмжээг бууруулдаг.

Харилцаа тэтгэврийн амьдралын чанарт нөлөөлнө

Моссын хувьд тэтгэврийн төлөвлөгөө зөвхөн зорилтот хуримтлалын хэмжээг тогтоосноор дуусахгүй.

“Тэр үеэс би аз жаргалтай болон аз жаргалгүй тэтгэвэр авагчдыг судалж эхэлсэн. Амьдралын хэв маяг асар чухал гэдгийг тэгээд ойлгосон” гэж тэр ярьжээ.

Харвардын Их Сургуулийн 1938 онд эхэлсэн урт хугацааны судалгаагаар эерэг, тогтвортой харилцаа нь хүмүүсийн аз жаргал, эрүүл мэндтэй нягт холбоотой байгааг тогтоожээ. Харин Германы судлаачдын 2013 оны мета-шинжилгээгээр хүний нийгмийн хүрээлэл насанд хүрэх эхэн үед тэлж, цааш нас ахих тусам хумигдах ерөнхий хандлага ажиглагджээ.

Тиймээс Мосс залуусыг тэтгэврийн хуримтлалаа эрт эхлүүлэхийн зэрэгцээ ирээдүйд цаг заваа хэрхэн өнгөрүүлэхээ мөн урьдчилан бодохыг зөвлөж байна. Хобби, зорилготой үйл ажиллагаа, нөхөрлөл болон бусад нийгмийн харилцааг хадгалах нь санхүүгийн төлөвлөгөөтэй адил тэтгэврийн амьдралын нэг хэсэг байх ёстой гэж тэрбээр зөвлөв.