Энэ онд угалз агнах квотыг 103 болгож нэмэгдүүлжээ

Гадаадын жуулчид Монгол Алтайд угалз агнасан зураг, бичлэгээ нийтэлсэн нь ангийн аялал жуулчлалын зөвшөөрөл, түүнээс олох орлогын хэмжээ олны анхаарлын төвд орлоо. Засгийн газар тавдугаар сард 85 угалз агнах хязгаар тогтоосон бол долоодугаар сарын 29-нд 103 болгон нэмэгдүүлжээ.

Увс аймгийн Байгаль орчны газрын мэргэжилтний есдүгээр сарын 28-нд өгсөн мэдээллээр тус аймагт энэ жил 10 угалз агнах зөвшөөрөл олгожээ. Өнгөрсөн долоодугаар сарын 1-нд ангийн улирал эхэлснээс хойш есдүгээр сарын 25-ны байдлаар гадаадын жуулчид есөн угалз агнаад байна.

Орлого хэрхэн бүрдэх вэ? Байгаль орчин, уур амьсгалын өөрчлөлтийн яамны Байгалийн нөөцийн газрын тайлбарласнаар, ангийн аялал жуулчлал эрхэлдэг Монголын компаниуд зөвшөөрлөө жил бүр дуудлага худалдаагаар авдаг. Дараа нь гадаадын анчдад аялал зохион байгуулж, байгалийн нөөц ашигласны болон дуудлага худалдааны төлбөр, улсын тэмдэгтийн хураамжийг холбогдох журмын дагуу төлнө. Ан хийх газарт орон нутгийн байгаль хамгаалагч газарчлан очдог аж.

Жуулчны аялалд төлсөн нийт мөнгө орон нутгийн төсөвт тэр чигээрээ ордог гэсэн үг биш юм. Харин "Байгалийн нөөц ашигласны төлбөрийн тухай" хуульд ан амьтны нөөц ашигласны төлбөрийн орлогын 50-иас доошгүй хувийг байгаль орчныг хамгаалах, байгалийн нөөцийг нөхөн сэргээх арга хэмжээнд зарцуулахаар заажээ.

Агнасан амьтнаа биетээр гадагш авч явахад орон нутгаас гарал үүслийн бичиг, яамнаас хилээр нэвтрүүлэх зөвшөөрөл олгодог байна.