Ганц бие хүмүүс амьдрахад хамгийн таатай 10 улсын жагсаалтыг Португал тэргүүлжээ

Ганц бие хүмүүст хамгийн таатай 10 улсын жагсаалтыг Португал тэргүүлжээ Ганц бие хүмүүсийн хувьд шинэ хүнтэй танилцах, болзоонд явахад хамгийн таатай орноор Португал тодорлоо. Болзооны зах зээл, аппын хэрэглээний мэдээллийг нэгтгэдэг “DateAtlas”-ийн 2026 оны индекс 30 улсыг харьцуулахад Португал 100-аас 79.8 оноо авч нэгдүгээрт эрэмбэлэгджээ. Харин Нидерланд 75.6 оноогоор удаалсан бол Филиппин 74.7 оноогоор гуравдугаарт орсон байна. Мэдээллийг хамгийн сүүлд энэ оны долдугаар сард шинэчилжээ. Ганц бие хүмүүсийн болзооны орчноор тэргүүлсэн 10 улсыг дараах байдлаар жагсаасан байна: Португал — 79.8 Нидерланд — 75.6 Филиппин — 74.7 Испани — 73.4 Тайланд — 72.8 Дани — 72.8 Норвеги — 72.5 Өмнөд Африк — 71.2 Польш — 71.1 Вьетнам — 70.8

Яагаад Португал тэргүүлэв? “DateAtlas” жагсаалтыг зөвхөн ганц бие хүмүүсийн тоогоор гаргаагүй аж. Харин аюулгүй байдлыг нийт үнэлгээний 20 хувь, болзооны зардал болон англи хэлний түвшнийг тус бүр 15 хувь, хүйсийн харьцааг 10 хувь, LGBTQ+ хүлээн зөвшөөрөлт болон соёлын нээлттэй байдлыг тус бүр 15 хувь, болзооны аппын хүртээмжийг 10 хувиар тооцжээ. Португал эдгээр үзүүлэлтийн нийлбэрээр хамгийн өндөр үнэлгээ авсан бөгөөд тус улсад хоёр хүний нэг удаагийн болзооны дундаж зардлыг 70 ам.доллар гэж тооцсон байна. Нидерландад уг зардал 142 ам.доллар байсан ч аюулгүй байдлын үнэлгээ 10-аас 7.4, англи хэлний түвшин “маш өндөр” ангилалд багтсан нь нийт оноог өсгөжээ. Харин гуравдугаарт орсон Филиппинд нэг удаагийн болзооны тооцоолсон зардал 33 ам.доллар байгаа нь Нидерландаас дөрөв дахин бага байна. Тайландад 47, Вьетнамд мөн 33 ам.доллар гэж тооцжээ. “DateAtlas” болзооны зардлыг дундаж түвшний ресторанд хоёр хүний хоол, хоёр дотоодын шар айраг, хоёр аяга кофе авах зардлаар тооцсон байна.

Болзооны зардал өндөр байх нь жагсаалтаас хасагдах шалтгаан биш Үүний зэрэгцээ Дани болон Норвеги улсууд болзооны зардлаараа хамгийн өндөр орнуудын тоонд багтжээ. Данид нэг удаагийн болзоо дунджаар 164 ам.долларын зардалтай байдаг бол Норвегид 176 ам.доллар зарцуулдаг гэж тооцсон ч аюулгүй байдал, англи хэлний түвшин зэрэг бусад үзүүлэлтээр өндөр оноо авсан байна. Харин нийт үнэлгээнд багтсан 30 орноос Швейцар улс хамгийн өндөр болзооны зардалтай улсаар нэрлэгдэж, дунджаар 218 ам.долларт хүрчээ. Тус улс нийт үнэлгээгээр 20 дугаарт орсон бол АНУ 23, Япон 25, Франц 27, Итали 29 дүгээрт эрэмбэлэгдсэн байна. Болзооны аппын хэрэглээнд ч улс орнуудын ялгаа ажиглагджээ. Топ 10 жагсаалтад багтсан ихэнх оронд цахим болзооны “Tinder” аппликейшн хамгийн өргөн хэрэглэгддэг бол Тайландад “ThaiFriendly” тэргүүлсэн байна. Харин Японд “Pairs”, БНХАУ-д “Tantan”, БНСУ-д “Amanda” хамгийн түгээмэл байжээ. “DateAtlas” үнэлгээндээ “Numbeo”-гийн амьдралын өртөг, аюулгүй байдлын мэдээлэл, “EF English Proficiency Index”, Дэлхийн банкны хүн ам зүйн дата, “Google Play”-ийн аппын мэдээлэл болон “ILGA World”-ийн үзүүлэлтийг ашигласан байна. Тус байгууллага уг жагсаалт нь албан ёсны статистик бус, дээрх дата дээр үндэслэсэн өөрсдийн нийлмэл үнэлгээ болохыг мөн анхааруулжээ.