Евро бүсийн бизнесийн идэвх сүүлийн гурван жилийн дээд түвшинд хүрчээ

Евро бүсийн бизнесийн идэвх сүүлийн гурван жилийн дээд түвшинд хүрчээ

Евро бүсийн бизнесийн идэвх есдүгээр сард сүүлийн гурван жил гаруйн хугацаан дахь хамгийн өндөр хурдаар тэлж, өсөлт саарна гэсэн зах зээлийн хүлээлтээс давлаа. Гэвч эрчим хүчний үнэ өссөнөөр компаниудын үйл ажиллагааны зардал нэмэгдэж, инфляцын эрсдэл дахин анхаарал татаж эхлэв.

“S&P Global”-ийн урьдчилсан нийлмэл худалдан авалтын менежерийн индекс буюу PMI есдүгээр сард 53.1 нэгжид хүрч, өмнөх сараас 1.1 нэгжээр өсчээ. Уг үзүүлэлт 2023 оны дөрөвдүгээр сараас хойших дээд түвшин болсон бөгөөд “Reuters”-ийн санал асуулгад оролцсон шинжээчид индексийг 51.7 нэгж хүртэл буурна хэмээн таамаглаж байв.

Худалдан авалтын менежерийн индекс буюу PMI нь аливаа улсын бизнес, үйлдвэрийн идэвхжлийг хэмжих үзүүлэлт ба индекс 50 нэгжээс давах бизнесийн идэвх тэлж байгааг илэрхийлдэг бол буурах нь агшилтыг илтгэнэ.

Евро бүсийн бизнесийн идэвх өсөхөд шинэ захиалгын сэргэлт голлон нөлөөлжээ. Шинэ захиалгын дэд индекс сүүлийн дөрвөн жил гаруйн хугацаан дахь хамгийн өндөр хурдаар нэмэгдсэн ба бүсийн дотоод худалдааг багтаасан экспортын захиалга ч нэмэгдсэн байна.

Харин үйлчилгээний салбарын PMI мөн хугацаанд 53.0 нэгжид хүрч, өмнөх сараас 1.4 нэгжээр өссөн нь сүүлийн нэг жил орчмын дээд түвшин боллоо. Харин үйлдвэрлэлийн PMI өөрчлөлтгүй 52.7 нэгжийн түвшинд тогтвортой хадгалагдсан ч үйлдвэрлэлийн гарцыг хэмжих дэд индекс өмнөх сараас 0.1 нэгжээр ахиж, 53.4 нэгжид хүрэв.

Эрэлт нэмэгдэхийн хэрээр компаниуд ажиллах хүчээ нэмэгдүүлжээ. Үүний зэрэгцээ эрчим хүчний өндөр ханш түүхий эд болон бусад орцын зардлыг өсгөсөн бөгөөд бизнесүүд нэмэгдсэн зардлынхаа тодорхой хэсгийг хэрэглэгчдэд шилжүүлж эхэлсэн байна.

“S&P Global”-ийн бизнесийн ахлах эдийн засагч Крис Уильямсон Ойрх Дорнодын хурцадмал байдлаас шалтгаалсан эрчим хүчний үнийн өсөлтийн үед инфляцын эрсдэл нэмэгдэх нь “гайхах зүйл биш” боловч эдийн засгийн өсөлт тогтвортой байгаа нь эерэг үзүүлэлт хэмээн тайлбарлав.