Амаржсаны дараах амралтаа эдэлж буй Явата хотын дарга эмэгтэйг TIME онцолжээ

АНУ-ын TIME сэтгүүл Японы Киото мужийн Явата хотын дарга Кавата Шёког энэ оны "TIME100 Next" жагсаалтын удирдагчдын ангилалд нэрлэв. Тус жагсаалтад дэлхийн улс төр, бизнес, технологи, урлаг, спорт зэрэг салбарын нөлөө нь өсөн нэмэгдэж буй 100 хүнийг багтаадаг.

Өдгөө 36 настай Кавата 2023 онд хотын даргаар 33 насандаа сонгогдож, тухайн үед Японы түүхэн дэх хамгийн залуу тэргүүн болсон юм. Харин өнгөрсөн долоодугаар сарын 20-ноос амаржсаны 16 долоо хоногийн чөлөө авч эхэлснээр албан тушаалаа хашиж байхдаа ийм шийдвэр гаргасан Японы анхны хотын дарга болжээ. Тэрбээр есдүгээр сарын 15-нд ууган охиныхоо зулайг үнэрлэсэн бол амралт нь арваннэгдүгээр сарын 8 хүртэл үргэлжилнэ.

Кавата чухал асуудлуудад цахимаар оролцож, хотын захиргааны ажлаа хийсээр байгаа аж.

Сонгогдсон албан тушаалтанд тусгай зохицуулалт гэж үгүй

Каватагийн шийдвэр Японы хөдөлмөрийн хууль тогтоомжид байгаа нэг ялгааг олон нийтийн анхааралд оруулав. Явата хотын захиргааны ажилтнууд амаржсаны 16 долоо хоногийн чөлөө авах боломжтой ч хотын дарга зэрэг сонгогдсон албан тушаалтанд уг зохицуулалт үйлчилдэггүй. Японд албан тушаалтны амаржсаны болон хүүхэд асрах чөлөөг баталгаажуулсан тусгай эрх зүйн тогтолцоо одоогоор байдаггүй аж.

Иймээс Кавата хотын удирдлагын үйл ажиллагааг тасалдуулахгүйгээр чөлөөгөө зохицуулах шинэ жишиг бий болгосныг TIME онцолжээ. Өөрөөр хэлбэл, “Дагах жишиг байгаагүй тул өөрөө шинэ жишиг бий болгосон” хэмээн тодорхойлсон байна.

Каватагийн шийдвэр Японд дэмжлэг болон шүүмжлэлийн аль алиныг дагуулав. Тэрбээр өмнө нь амаржсаны амралт авах боломж удирдах албан тушаалтай зөрчилдөх ёсгүй гэсэн байр суурийг илэрхийлж, хотын захиргааны хэвийн үйл ажиллагаанд нөлөөлөхгүйгээр ажлаа зохион байгуулахаар төлөвлөснөө мэдэгдэж байв.

Гэр бүлд чиглэсэн бодлогыг TIME онцолжээ

TIME Каватаг зөвхөн амаржсаны чөлөө авсан шийдвэрээр нь бус, Явата хотод хэрэгжүүлж буй гэр бүлд чиглэсэн бодлогоор нь онцолсон байна. Түүний удирдлага сургуулийн хоолны зардлыг бууруулах, цэцэрлэгүүдэд живхийг үнэ төлбөргүй болгох, төрсний дараах эх, хүүхдийн тусламж үйлчилгээг өргөжүүлэх зэрэг арга хэмжээ хэрэгжүүлжээ.

Каватагийн амаржсаны чөлөө Японд төрөлт буурч, ажил болон гэр бүлийн амьдралыг хэрхэн хослуулах асуудал улам анхаарал татаж буй үед тохиож байна. Түүний хувьд хувийн шийдвэрээс эхэлсэн асуудал сонгогдсон албан тушаалтнуудын хөдөлмөрийн нөхцөл, хүүхэд асрах боломж болон төрийн байгууллагын зохион байгуулалтын талаар илүү өргөн хэлэлцүүлэг өрнүүлэх нэг жишээ болжээ.