Монголын XIX зууны 34 цуврал зураг ЮНЕСКО-ийн бүсийн баримтат өвд бүртгэгдлээ

Монгол Улсын XIX зууны түүх, соёлын дурсгал болох “Бурхан багшийн шүтээн зурагт намтар” бүтээл ЮНЕСКО-ийн “Дэлхийн дурсамж” хөтөлбөрийн Ази, Номхон далайн бүсийн баримтат өвийн жагсаалтад шинээр бүртгэгдлээ.

ЮНЕСКО-ийн “Дэлхийн дурсамж” хөтөлбөрийн Ази, Номхон далайн бүсийн хорооны 11 дүгээр Ерөнхий чуулган Индонезийн нийслэл Жакарта хотод болж, чуулганы үеэр улс орнуудаас нэр дэвшүүлсэн 28 баримтат өвийг хэлэлцэж, 10 улсын 21 өвийг бүсийн жагсаалтад бүртгэн, гэрчилгээг нь гардуулжээ.

Бурхан багшийн намтрыг 34 цуврал зургаар дүрсэлжээ

“Бурхан багшийн шүтээн зурагт намтар” нь XIX зууны Монголын нэр нь тодорхойгүй бурханч ламын бүтээл юм. Тус өв нь 28×22 сантиметр хэмжээтэй цаасан дээр шороон будгаар зурсан, Бурхан багшийн намтрыг өгүүлсэн 34 цуврал зургаас бүрддэг. Бүтээлд Бурхан багшийн өмнөх төрөл, олон дүрд хувилан амьдарсан түүхээр дамжуулан энэрэнгүй сэтгэл, үнэнч байдал, ёс суртахуун болон зөв сэтгэлийг эрхэмлэх үзэл санааг дүрслэн харуулжээ.

Энэхүү цуврал зураг нь Монголын шашны дүрслэх урлаг, буддын шашны сургаал, түүхэн өгүүлэмжийг дүрсээр илэрхийлсэн өвийн нэг бөгөөд Г.Занабазарын нэрэмжит Дүрслэх урлагийн музейн сан хөмрөгт хадгалагдаж байна.

Монголын музей судлаачид материалыг боловсруулжээ

Тус бүтээлийг ЮНЕСКО-ийн бүсийн жагсаалтад нэр дэвшүүлэх судалгаа, баримт бичгийг боловсруулах ажлыг Г.Занабазарын нэрэмжит Дүрслэх урлагийн музейн захирал, урлаг судлалын ухааны доктор П.Байгалмаа болон музейн эрдэм шинжилгээний ажилтнууд гүйцэтгэжээ.

Энэ ажлыг Соёл, спорт, аялал жуулчлал, залуучуудын яамны Төрийн нарийн бичгийн даргаар ахлуулсан ЮНЕСКО-ийн “Дэлхийн дурсамж” хөтөлбөрийн үндэсний хорооны зохион байгуулалт, арга зүйн дэмжлэгтэйгээр хэрэгжүүлсэн байна.

Баримтат өвийг олон улсад таниулах боломж нэмэгдэв

ЮНЕСКО-ийн “Дэлхийн дурсамж” хөтөлбөр нь хүн төрөлхтний түүх, соёлын ач холбогдолтой баримтат өвийг хамгаалах, хадгалалт, хүртээмжийг сайжруулах, олон нийтэд таниулах зорилготой.

“Бурхан багшийн шүтээн зурагт намтар” бүтээлийг Ази, Номхон далайн бүсийн жагсаалтад бүртгэсэн нь Монголын шашин, соёл, дүрслэх урлагийн өвийг олон улсын түвшинд таниулах, цаашдын судалгаа, хадгалалт хамгаалалтад анхаарал хандуулах боломжийг нэмэгдүүлж байна.