Өндөр гэгээн Занабазарын балчир насны ховор хөрөгтэй танилц
Соёмбо үсэг зохиосны 340 жилийн ойд зориулсан эрдэм шинжилгээний хурал үргэлжилж байна.
Өндөр гэгээн Занабазарын балчир насыг дүрсэлсэн ховор хөрөг зургийг Соёмбо үсэг зохиосны 340 жилийн ойд зориулсан эрдэм шинжилгээний хурлын үеэр олон нийтэд дэлгэн үзүүлжээ.
Зураач нь тодорхойгүй уг хөрөг цуглуулагч А.Алтангэрэлийн хувийн цуглуулгад хадгалагдаж байжээ.
Зүүн Хүрээ Дашчойлин хийдээс зохион байгуулж буй “Өндөр гэгээний үсгийн урлал: Соёмбо үсгийн судлалд” эрдэм шинжилгээний хуралд түүх, хэл шинжлэл, шашин, соёлын салбарын эрдэмтэн судлаачид, лам хуврагууд болон соёл урлагийн төлөөлөл оролцож байна.
Судлаачид Соёмбо үсгийн үүсэл, түүхэн хөгжил, утга бэлгэдэл, Монголын бичиг соёлын өвд эзлэх байр суурийн талаар сонирхолтой илтгэлүүд хэлэлцүүлж байна. Соёмбо үсэг нь монголчуудын оюун санаа, түүх, төрт ёсны бэлгэдлийг шингээсэн онцгой өв гэдгийг зохион байгуулагчид онцолжээ. Өндөр гэгээн Занабазар 1686 онд Соёмбо үсгийг зохиосон гэж түүхэн сурвалжуудад тэмдэглэсэн байдаг. Монголын бичиг соёлын түүхэнд онцгой байр суурь эзэлдэг бөгөөд Монгол Улсын төрийн далбаа, сүлдэнд мөнхөрсөн бүтээл юм.
Шинэ мэдээг цахим шуудангаар авах бол бүртгүүлнэ үү.
Холбоотой мэдээ
