NHL-ийн 32 баг хотынхоо онцлогийг шингээсэн өмсгөлтэй боллоо

Спортын хувцас, хэрэгсэл үйлдвэрлэгч “Fanatics” болон Хойд Америкийн Үндэсний хоккейн лиг (NHL) арваннэгдүгээр сарын 2-нд 32 багийн хот, орон нутгийн соёл, хөгжөөн дэмжигчдийн онцлогийг тусгасан “Hometown Remix” нэртэй шинэ өмсгөлийн коллекцоо танилцууллаа.

Энэ нь “Fanatics” компани NHL-ийн бүх багийн өмсгөлийн коллекцын загвар, үйлдвэрлэл болон хэрэгжилтийг нэгдсэн байдлаар хариуцсан анхны томоохон санаачилга болж буйгаараа онцлог.

Шинэ өмсгөлүүд нь баг бүрийн уламжлалт өнгө, бэлгэдлийг хадгалахын зэрэгцээ тухайн хотын түүх, орон нутгийн онцлогийг загварт шингээжээ.

Хотын түүхийг өгүүлсэн өмсгөлүүд “Hometown Remix” коллекцын гол зорилго нь хоккейн багуудыг төлөөлдөг хот, орон нутгийн ялгаатай соёл, хөгжөөн дэмжигчдийн онцлогийг загвараар илэрхийлэхэд оршино.

NHL-ийн төлөөлөгч Брайан Женнингсийн тайлбарласнаар хот, зах зээл бүр өөрийн гэсэн онцлогтой учраас шинэ коллекцоор дамжуулан эдгээр ялгааг тодотгохыг зорьжээ.

Тэрбээр шинэ загварууд нь хөгжөөн дэмжигчдэд өөрийн хот, дэмждэг багтайгаа холбоотой байдлаа илэрхийлэх боломж олгоно гэж үзэж байгаагаа онцолсон байна.

Багууд 2026-2027 оны улирлын үлдсэн хугацаанд тодорхой тоглолтуудад шинэ өмсгөлөө өмсөх бөгөөд тухайн загварын цаадах хотын түүх, бэлгэдлийг хөгжөөн дэмжигчдэд танилцуулахаар төлөвлөжээ. Тухайлбал, Чикагогийн “Blackhawks” багийн өмсгөлд хотын далбааны зургаан хошуут оддыг, Виннипегийн “Jets” багийн өмсгөлд туйлын туяаны дүрслэлийг тусгасан нь фэнүүдийнх нь сонирхлыг ихэд татаж байгаа аж.

Шинэ өмсгөлийн үнэ 275-500 ам.доллар

“Hometown Remix” цуглуулгын өмсгөлүүдийг хөгжөөн дэмжигчдэд зориулсан хэд хэдэн хувилбараар худалдаанд гаргахаар болжээ.

Дээд зэрэглэлийн загварын өмсгөл 275 ам.доллар, харин тоглогчдын талбайд өмсдөг хувилбартай ижил стандартын өмсгөл 500 ам.долларын үнэтэй байна.

Ингэснээр шинэ коллекц нь зөвхөн багуудын тоглолтын хувцсыг шинэчлэхээс гадна хөгжөөн дэмжигчдэд зориулсан бүтээгдэхүүний зах зээлийг өргөжүүлэх зорилготой.

Спортын өмсгөлийн худалдаанд багийн уламжлалт лого, өнгөнөөс гадна тухайн хотын соёл, түүхийг тусгасан хязгаарлагдмал болон тусгай загварын бүтээгдэхүүнүүд чухал байр суурь эзэлдэг.

“Fanatics” NHL-тэй 20 гаруй жил хамтран ажиллаж байна

“Fanatics” компани 2005 оноос NHL-тэй жижиглэн болон цахим худалдааны чиглэлээр хамтран ажиллаж, 2023 онд тоглолтын албан ёсны өмсгөлийн түншлэлээ өргөжүүлжээ.

Улмаар 2024-2025 оноос тоглогчдын талбайд өмсөх албан ёсны өмсгөлийг нийлүүлж эхэлсэн байна. Энэ нь тус компанийн лого NHL-ийн тоглолтын өмсгөл дээр албан ёсоор байрласан анхны тохиолдол юм.

“Hometown Remix” хөтөлбөр нь спортын өмсгөлийг зөвхөн тоглолтын хэрэгсэл бус, хөгжөөн дэмжигчдийн орон нутгийн бахархал, багтайгаа холбогдох сэтгэл хөдлөлийг илэрхийлэх бүтээгдэхүүн болгон хөгжүүлэхэд чиглэж байна.