Мбаппе уучлал хүссэн ч БНХАУ-ын төв телевиз “Реал Мадрид”-ын тоглолтоос татгалзав

Францын хөлбөмбөгчин Килиан Мбаппе Мао Зэдунтэй холбоотой хошигнолынхоо төлөө уучлал хүссэн ч БНХАУ-ын төрийн төв телевиз CCTV ням гарагт болсон “Реал Мадрид”-ын тоглолтыг нэвтрүүлээгүй юм.

Тодруулбал, арваннэгдүгээр сарын 1-нд “Реал Мадрид” болон “Расинг Сантандер” багуудын хооронд болсон Испанийн Ла лигийн тоглолтыг CCTV-ийн спортын хоёр сувгийн аль алинаар нь ч шууд дамжуулаагүйг AFP агентлаг мэдээлжээ. Мөн Ла лигийн 11 дүгээр тойргийн бусад тоглолтыг ч БНХАУ-ын төрийн телевизээр шууд дамжуулаагүй байна.

Энэ нь Мбаппегийн мэдэгдлээс үүдсэн маргааны улмаас БНХАУ-ын хэвлэл мэдээллийн байгууллага Испанийн хөлбөмбөгийн лигийн нэвтрүүлгийг түдгэлзүүлсэн шийдвэрээ үргэлжлүүлэн хэрэгжүүлж байгааг харууллаа.

Мао Зэдунтэй холбоотой хошигнол

Маргаан Мбаппегийн Францын “The Bridge” нэвтрүүлэгт оролцох үеэрээ ярьсан хошигнолын бичлэг цахим орчинд тархсанаар эхэлсэн байна.

Тэрбээр өөрийнх нь царайг БНХАУ-ын удирдагч асан Мао Зэдуны зурагтай эвлүүлсэн интернет миймийг хөгжилтэй санагддаг хэмээн ярьжээ. Ингэхдээ Мао Зэдуныг БНХАУ-ын дарангуйлагч байсан гэж тодорхойлсон нь тус улсын олон нийтийн сүлжээнд шүүмжлэл дагуулсан юм.

Үүний дараа БНХАУ-ын төрийн хэвлэл мэдээллийн “China Media Group” аравдугаар сарын 26-нд Ла лигийн тоглолтуудыг дамжуулахаас түдгэлзсэн байна.

Мбаппе аравдугаар сарын 27-нд гаргасан мэдэгдэлдээ бодлогогүй үн хэлснээ хүлээн зөвшөөрч, гомдоосон хүмүүсээсээ уучлал хүсчээ. Үүний дараа “Реал Мадрид” клуб болон Ла лигийг зохион байгуулагчдын зүгээс БНХАУ-ын ард иргэдээс уучлал хүсчээ.

БНХАУ-ын компаниуд Мбаппетай байгуулсан гэрээгээ цуцалжээ

Маргаан телевизийн нэвтрүүлгээр хязгаарлагдсангүй. БНХАУ-ын “Dongpeng Beverage”, “Mengniu” болон “Milkground” компаниуд Мбаппетай байгуулсан сурталчилгаа, хамтын ажиллагааны гэрээгээ цуцалсан талаар олон улсын хэвлэлүүд мэдээлжээ. БНХАУ-ын спортын зах зээл Европын хөлбөмбөгийн клуб болон лигүүдийн хувьд телевизийн нэвтрүүлэг, сурталчилгаа, ивээн тэтгэгчийн орлогын чухал эх үүсвэрийн нэг юм. Иймээс маргаан үргэлжилбэл Ла лиг болон холбогдох байгууллагуудын арилжаанд ч нөлөөлөх эрсдэлтэй.

БНХАУ өмнө нь улс төрийн мэдэгдэлтэй холбоотойгоор олон улсын спортын байгууллагуудтай харилцаагаа хязгаарлаж байсан. Тухайлбал, 2019 онд “Хьюстон Рокетс” багийн ерөнхий менежер асан Дэрил Мори Хонконгийн жагсаалыг дэмжсэн мэдэгдэл хийсний дараа БНХАУ-ын телевиз NBA-ийн тоглолтын нэвтрүүлгийг зогсоож байв.

Энэ удаад Мбаппе болон холбогдох байгууллагууд уучлал хүссэн ч CCTV Ла лигийн тоглолтыг дахин нэвтрүүлж эхлээгүй байна. Нэвтрүүлгийг түдгэлзүүлсэн шийдвэр хэр удаан үргэлжлэх нь тодорхойгүй хэвээр үлдлээ.