“The MongolZ” баг дэлхийн аваргын үндсэн шатанд өрсөлдөнө

“The MongolZ” баг ирэх оны нэгдүгээр сард Туркийн Истанбул хотноо болох M8 дэлхийн аварга шалгаруулах тэмцээний үндсэн шатанд оролцох эрхтэй боллоо. Тус баг аравдугаар сарын 31-нд Улаанбаатар хотын “M Bank Arena”-д болсон “Mobile Legends: Bang Bang” (MLBB) тоглоомын Зүүн Азийн аварга шалгаруулах “MCT East Asia” тэмцээнд түрүүлсэн юм. Харин Зүүн Азийн тэмцээнд удаалсан “DianFengYaoGuai” болон гуравдугаар байр эзэлсэн “Guangzhou Gaming” багууд дэлхийн аваргын Wild Card буюу урьдчилсан шатанд оролцох эрх авчээ. DFYG болон Guangzhou Gaming багуудын оролцох Wild Card шатны тулаан ирэх сард Тайландын Бангкок хотноо болох бөгөөд тус шатанд 10 баг үндсэн шатны гурван эрхийн төлөө өрсөлдөнө.

Улаанбаатар хотод болсон Зүүн Азийн аварга шалгаруулах “MCT East Asia” тэмцээн MLBB-ийн дэлхийн аваргын M Series цувралтай шууд холбогдсон бүсийн анхны тэмцээн гэдгээрээ онцлог байв.

Монголын баг эхлээд доод хүснэгтийн шигшээ тоглолтод Хятадын “Guangzhou Gaming” багийг 3:0-ээр буулган авч, аваргын төлөө өрсөлдөх эрхээ авчээ.

Улмаар их шигшээ тоглолтод Хятадын “DianFengYaoGuai” (DFYG) багтай учраа таарч, 5:3-аар ялалт байгуулан аваргын цом өргөсөн байна. Тэмцээнийг зохион байгуулагч “MOONTON Games” болон Монголын цахим спортын байгууллага “ESN” хамтран “Immortality Armour” буюу “Үхэшгүй хуяг” нэртэй шинэ механизмыг дүрэмдээ нэвтрүүлжээ.

Дүрмийн дагуу хасагдах шатанд ялагдалгүй явсан DFYG баг аварга болохын тулд дөрвөн тоглолтод ялалт байгуулах давуу эрхтэй байв.

Энэ дагуу “The MongolZ” дөрвөн удаа ялалт байгуулснаар өрсөлдөгчийнхөө давуу эрхийг хүчингүй болгож, шийдвэрлэх тав дахь ялалтаа авснаар аваргын цомыг хүртжээ.