“Рио Тинто” "Оюу толгой"-н ногдол ашгийг 2027 онд олгох төлөвлөгөө боловсруулж эхэлжээ

“Оюу толгой” ХХК болон “Рио Тинто” группээс ирэх онд ногдол ашиг хуваарилах асуудлаар Монгол Улсын Засгийн газарт албан ёсны захидал ирүүлжээ. Уг захидлыг арваннэгдүгээр сарын 9-ний байдлаар хүлээн авсан талаар Сангийн сайд З.Мэндсайхан Засгийн газрын арваннэгдүгээр сарын 11-ний хуралдаанд танилцуулсан байна.

Захидалд Монгол Улсын Ерөнхий сайд болон “Рио Тинто” группийн гүйцэтгэх захирлын уулзалтын үеэр “Оюу толгой” ХХК-аас 2027 онд хувьцаа эзэмшигчдэд эзэмшлийн хувь хэмжээнд нь нийцүүлэн ногдол ашиг хуваарилах асуудлаар санал солилцсоныг дурджээ.

Мөн Монгол Улсын Засгийн газар ирэх онд "Оюу толгой"-оос 3 их наяд төгрөг төвлөрүүлэхээр төлөвлөсөнтэй холбогдуулан ногдол ашиг олгох төлөвлөгөө боловсруулж байгаагаа илэрхийлжээ.

Энэхүү ногдол ашиг нь “Оюу толгой” ХХК-ийн улсын төсөвт төлөх татвар, ашигт малтмалын нөөц ашигласны төлбөр болон бусад хураамжаас тусдаа байхыг захидалд онцолсон байна.

Аж үйлдвэр, эрдэс баялгийн сайд Г.Дамдинням арваннэгдүгээр сарын 11-нд сэтгүүлчдийн асуултад хариулахдаа мөн "Оюу толгой"-н ногдол ашгийг олгохоор байгааг мэдэгдсэн юм. Харин хэзээ олгох тухайд компанийн жилийн эцсийн санхүүгийн тайлан гарсны дараа холбогдох дүрэм, журмын дагуу шийдвэрлэнэ хэмээн тайлбарлав.

Гэхдээ ногдол ашгийн хэмжээг эцэслэн тогтоохын тулд компанийн санхүүгийн үзүүлэлт, мөнгөн хөрөнгө болон бусад нөхцөлийг харгалзан үзэх шаардлагатайг хөрөнгө оруулагч талын төлөөлөгчид тайлбарлажээ.

Тиймээс Засгийн газрын төлөвлөсөн 3 их наяд төгрөг нь одоогоор хувьцаа эзэмшигчдийн шийдвэрээр баталгаажсан, эсвэл Монголын талд шилжүүлсэн мөнгөн дүн биш юм.

Ногдол ашиг хуваарилах нөхцөл, хэмжээ, хуваарийг тодорхойлох чиглэлээр Сангийн сайд З.Мэндсайханаар ахлуулсан ажлын хэсэг үргэлжлүүлэн ажиллаж байна.