Шүлхийн эсрэг 3.6 сая тун вакцин худалдан авч, хангай болон говийн бүсийн үхэр сүргийг дархлаажуулна

Улсын хэмжээнд малын халдварт өвчнөөс урьдчилан сэргийлэх төлөвлөгөөт дархлаажуулалт 90 гаруй хувийн гүйцэтгэлтэй үргэлжилж байгааг Мал эмнэлгийн ерөнхий газраас мэдээллээ. Энэ онд 19 төрлийн халдварт өвчнөөс урьдчилан сэргийлэх дархлаажуулалтыг тогтоосон технологийн хугацаанд зохион байгуулж, эхний хоёр шатных нь бүрэн дуусчээ.

Малын гоц халдварт шүлхий болон ямааны годрон өвчин гарсантай холбоотойгоор төлөвлөгөөт дархлаажуулалтаас гадна нэмэлт арга хэмжээ авах, вакцины нөөц бүрдүүлэх шаардлага үүссэнийг албаныхан онцолжээ.

Үүнээс шалтгаалан мал эмнэлгийн салбарын зардал нэмэгдэж, 2026 онд 30.8 тэрбум төгрөгийн нэмэлт санхүүжилт шаардлагатай болсныг Хүнс, хөдөө аж ахуй, хөнгөн үйлдвэрийн сайдад танилцуулж, улсын төсвийн тодотголоор шийдвэрлэсэн тухай мэдээлэв.

Шүлхийн эсрэг 3.6 сая тун вакцин худалдан авчээ

Шүлхий өвчнөөс урьдчилан сэргийлэх дархлаажуулалтын гуравдугаар шатанд зориулан 3.6 сая тун вакцин худалдан авах ажлыг зохион байгуулжээ.

Дархлаажуулалтад хангай болон говийн бүсийн үхэр сүргийг хамруулахаар төлөвлөсөн байна.

Вакциныг арваннэгдүгээр сарын 5-ны дотор аймаг, орон нутгийн мал эмнэлгийн байгууллагуудад хүргэх бэлтгэл хангаж, дархлаажуулалтыг арваннэгдүгээр сарын 8-наас эхлүүлэн арванхоёрдугаар сарын 1-ний дотор дуусгахаар товложээ.

Өмнөх оны 17.3 тэрбум төгрөгийн өрөөс 10.1 тэрбумыг нь барагдуулжээ

Мал эмнэлгийн ерөнхий газар 2025 оны эцэст 17.3 тэрбум төгрөгийн өр төлбөрийн үлдэгдэлтэй гарсан. Энэ асуудлыг салбарын сайдад танилцуулж, 10.1 тэрбум төгрөгийн өр төлбөрийг барагдуулжээ. Ингэснээр өмнөх оны өрөөс 7.2 тэрбум төгрөгийн үлдэгдэлтэй байгаа аж.

Тус байгууллага 2025 оны үлдэгдэл өр төлбөр болон 2026 оны нэмэлт санхүүжилттэй холбоотой асуудлыг арваннэгдүгээр сарын 15-ны дотор шийдвэрлэхээр ажиллаж байгаагаа мэдээлсэн байна.

Дотоодын вакцин үйлдвэрлэлийг дэмжих асуудлыг Засгийн газрын хуралдаанд танилцуулж, 1.5 тэрбум төгрөгийн нэмэлт санхүүжилт шийдвэрлүүлсэн байна.

Вакцин үйлдвэрлэлийн нийт зардлын 80 хувийг “Биокомбинат” ТӨХК-д шилжүүлж, үйлдвэрлэлийн ажлыг эрчимжүүлээд байгаа аж.