"Toyota"-ийн борлуулалт болон үйлдвэрлэл хоёр дахь сардаа дараалан буурлаа

Дэлхийн хамгийн том автомашин үйлдвэрлэгч “Toyota Motor”-ийн борлуулалт наймдугаар сард өмнөх оны мөн үеэс 6.4 хувиар буурч, 790.7 мянган автомашинд хүрлээ. Харин үйлдвэрлэл мөн хугацаанд 5.9 хувиар агшиж, 700.9 мянган автомашин болжээ.

Ингэснээр компанийн дэлхийн зах зээл дэх борлуулалт, үйлдвэрлэл хоёр дахь сардаа дараалан буурч буй. Өмнөх сард ч БНХАУ, АНУ болон Ойрх Дорнодын зах зээл дэх сул үзүүлэлт компанийн санхүүгийн гүйцэтгэлд сөргөөр нөлөөлсөн юм.

Бууралтыг бүс нутгаар задалж үзвэл, Хятад дахь борлуулалт 22.8 хувиар огцом буурснаар долоо дахь сардаа дараалан агшжээ. Бензиний үнэ өссөнөөр тус зах зээлд хайбрид болон уламжлалт хөдөлгүүртэй автомашины эрэлт суларсан байна.

Мөн “Toyota”-ийн хамгийн том зах зээл болох АНУ-д борлуулалт 4.4 хувиар унасан, Ойрх Дорнодод 37.5 хувиар огцом агшжээ. Харин Япон дахь борлуулалт 9.1 хувиар өссөн ч бусад томоохон зах зээлийн уналтыг нөхөж чадсангүй.

Үйлдвэрлэлийн хувьд Хятад дахь гарц 11.3 хувиар буурсан бол АНУ-д 6.6 хувиар уналаа. Мөн Япон дахь үйлдвэрлэл 1.7 хувиар агшихад Кюүшюү аралд болсон газар хөдлөлтийн дараа зарим үйлдвэрийн ажиллагааг түр зогсоосон нь тодорхой хэмжээнд нөлөөлжээ.

Компанийн нийтэлсэн борлуулалт, үйлдвэрлэлийн үзүүлэлтэд тансаг зэрэглэлийн “Lexus” брэндийн автомашинууд мөн багтсан байна.