Английн ахимаг насны ажилтнуудын 68% нь Z үеийн ажилтнуудынхаа үг яриа, хэллэгийг ойлгохгүй байна

Ажлын байрны хэллэгүүд үе хоорондын харилцаанд шинэ саад болж байна. Их Британийн хэвлэлийн үйлчилгээний “instantprint” компани оффист ажилладаг 2,000 хүнээс судалгаа авахад оролцогчдын 68 хувь нь залуу хамт олныхоо хэрэглэсэн зарим үг, хэллэгийг тогтмол ойлгодоггүй гэж хариулжээ. Мөн мэдэхгүй зүйлээ шууд асуух нь тэдэнд цаг үеэс хоцорсон мэт мэдрэмж төрүүлдэг байна. Тодруулбал, судалгаанд оролцогчдын 36 хувь нь өөр үеийн хамт олноосоо тухайн хэллэгийн утгыг тайлбарлаж өгөхийг хүсэхээс санаа зовж, эвгүйцдэг хэмээн хариулжээ. “instantprint”-ийн маркетингийн менежер Крэйг Васселлийн хэлснээр асуудал зөвхөн нэг үеийнхэнд хамаарахгүй байгаа юм. Тухайлбал, залуу ажилтнууд оффисын хуучны хэллэгийг ойлгохгүй байх магадлал ахмад ажилтнууд шинэ нэршлээс хоцрохтой ойролцоо байгаа бөгөөд ажлын байрны хэл байнга өөрчлөгдөж буйг анхаарах хэрэгтэй гэж тайлбарлав.

“Coffee badging”-ээс “rage applying” хүртэл Сүүлийн жилүүдэд Z үеийн ажилтнуудын дунд ажлын хэв маяг, ажилдаа хандах хандлагыг тодорхойлсон шинэ нэршлүүд олширчээ. Тухайлбал, “Coffee badging”: Оффист ирснээ харуулах төдий богино хугацаанд үзэгдээд, кофе аваад явдаг ажилтан. “Bare Minimum Monday”: Даваа гарагт зөвхөн зайлшгүй хийх ажлуудаа гүйцэтгэж, бусад ажлыг маргаашнаас нь хийж эхлэх хандлага “Career cushioning”: Одоогийн ажлаа хийж байхдаа дараагийн карьерын хувилбараа чимээгүй бэлдэх “Rage applying”: ажилдаа бухимдсан үедээ олон ажлын байранд зэрэг өргөдөл илгээх “Rage applying”-ийн утгыг Z үеийн ажилтнуудын 81 хувь зөв тодорхойлсон бол Baby Boomer үеийнхний ердөө 29 хувьнь энэ хэллэгийг талаар мэдэж байв. Харин “Coffee badging”-ийг Baby Boomer үеийнхний 21 хувь, X үеийнхний 34 хувь зөв тайлбарлажээ.

Үе хоорондын ажлын соёлын ялгааг үл тоож болохгүй Үүний зэрэгцээ Крэйг Васселл ажлын байрны этгээд хэллэгийг үе хоорондын ялгаа төдийд авч үзэн, үл тоож болохгүй гэдгийг анхааруулжээ. Учир нь ажилтан мэдэхгүй үг хэллэг гарах үедээ бусдаас тодруулан асуухаасаа ичсэндээ ойлгосон дүр үзүүлэх, хурлын үеэр санал хэлэхээс зайлсхийх, эсвэл өгсөн даалгаврыг буруу ойлгох үед бодит саад болж магадгүй юм. Түүний хэлснээр хамт олон, хэрэглэгч эсвэл харилцагчтай харилцах аль ч тохиолдолд хамгийн үр дүнтэй мэдээлэл бол хүлээн авч буй хүн шууд ойлгож чадах мэдээлэл юм. Мөн “instantprint”-ийн судлаачид ажлын байрны харилцаанд мэргэжлийн этгээд хэллэгийг багасгаж, илүү тодорхой үг сонгох нь үе хоорондын үл ойлголцлыг бууруулах боломжтой гэж үзжээ.