ОХУ-аас захиалсан 15 мянган тонн АИ-92 автобензин Монголын хилээр орж ирээгүй байна

Монгол Улс АИ-92 автобензиний 10 хоногийн нөөцтэй байгааг Ашигт малтмал, газрын тосны газар өнөөдөр мэдээллээ. Есдүгээр сарын 29-ний байдлаар улсын хэмжээнд 20,500 тонн АИ-92 автобензин нөөцлөөд байгаа бол АИ-95 автобензин 14 хоног, дизель түлшнийх 85,600 тонн буюу 21 хоног, онгоцны түлш 4,670 тонн буюу 23 хоногийн нөөцтэй байгаа аж.

Есдүгээр сарын 28-ны байдлаар Монгол Улс тухайн сард нийт 57,300 тонн АИ-92 автобензин, 188,500 тонн дизель түлш, 11 мянган тонн онгоцны түлш импортолжээ.

8,400 тонн АИ-92 автобензин замд явна

Есдүгээр сарын 29-ний байдлаар 140 вагон буюу 8,400 тонн АИ-92 автобензин Монгол Улсад төмөр замаар тээвэрлэгдэж байгаагаас 49 вагоныг өртөөдийн агуулахад буулгаж байгаа аж.

Өчигдөр нийслэлийн 168 шатахуун түгээх станцад 1,848 тонн, орон нутгийн 78 станцад 1,002 тонн АИ-92 автобензин ачжээ. Есдүгээр сарын эхний 28 хоногт АИ-92 автобензиний импорт 57 мянган тоннд хүрсэн байна.

БНХАУ-аас 5,000 тонн АИ-92 автобензин нийлүүлжээ

Монгол Улс шатахууныхаа хэрэглээг импортоор хангадаг. ОХУ-аас гадна БНХАУ-аас 5,000 тонн АИ-92 автобензин нийлүүлснийг Замын-Үүд өртөөнд шилжүүлэн ачиж, эхний хэсгийг Улаанбаатар руу хүргэжээ.

Хятадаас импортолж буй шатахууныг төмөр замын царигийн зөрүүнээс шалтгаалан Замын-Үүдэд шилжүүлэн ачих шаардлагатай тул тээвэрлэлтэд илүү хугацаа орж байгаа аж. Харин ОХУ-аас нийлүүлсэн бүтээгдэхүүн Сүхбаатар өртөөгөөр вагоноо солихгүйгээр шууд тээвэрлэгддэг.

Сүүлийн хэд хоногт ОХУ-ын талд вагоны олдоц багассанаас АИ-92 автобензиний ачилт буурч, захиалсан АИ-92 шатахуунаас 15 мянган тонн нь Монгол Улсын хилээр хараахан орж ирээгүй байгаа аж.

Иймд АМГТГ-аас иргэдийг шаардлагатай хэмжээгээр шатахуун авч, хэрэглээгээ зохистой төлөвлөхийг сануулжээ.