Угаарын хий өссөн тухай дуудлага нэг шөнийн дотор 41 хувиар нэмэгджээ
Арваннэгдүгээр сарын 11–12-нд шилжих шөнө нийслэлийн 114 өрхөөс угаарын хийн хэмжээ нэмэгдсэн тухай мэдээлэл ирсэн нь өмнөх шөнийнхөөс 33 өрхөөр буюу 40.7 хувиар өссөн үзүүлэлт юм.
Нийслэлийн гэр хорооллын айл өрхүүдээс угаарын хийн хэмжээ нэмэгдсэн тухай мэдээлэл ирэх нь олширч, нэг шөнийн дотор бүртгэгдсэн өрхийн тоо 40.7 хувиар нэмэгджээ.
Түлш хэрэглэгчдэд үйлчлэх төвийн мэдээлснээр арваннэгдүгээр сарын 11-нээс 12-нд шилжих шөнө нэгдсэн хяналтын төвд 114 өрхөөс угаарын хийн хэмжээ нэмэгдсэн тухай мэдээлэл ирсэн байна. Тус төвийн ажилтнууд холбогдох арга хэмжээ авч, 342 иргэнийг болзошгүй эрсдэлээс сэргийлжээ.
Харин арваннэгдүгээр сарын 10-наас 11-нд шилжих шөнө 81 өрхөөс ижил төрлийн мэдээлэл бүртгэгдсэн аж. Ингэснээр дараалсан хоёр шөнийн үзүүлэлтийг харьцуулахад угаарын хийн аюулын дохио бүртгэгдсэн өрхийн тоо 33-аар нэмэгджээ.
Энэ бүхэн юуг анхааруулж байна вэ?
Хүйтний улиралд гэр хорооллын өрхүүдийн галлагаа нэмэгдэхийн хэрээр зуух, пийшин, яндан ашиглалтын аюулгүй байдал онцгой чухал болдог.
Угаарын хий буюу нүүрстөрөгчийн дутуу исэл нь өнгө, үнэргүй тул хүний мэдрэхүйгээр илрүүлэх боломжгүй. Иймээс угаарын хий мэдрэгчийн хэвийн ажиллагаа, яндангийн таталт, зуухны битүүмжлэл нь хордлогоос урьдчилан сэргийлэхэд чухал үүрэгтэй аж.
Түлш хэрэглэгчдэд үйлчлэх төвөөс иргэдэд алсын зайнаас мэдээлэл дамжуулдаг INTUM угаарын хий мэдрэгч болон холбогдсон гар утсаа тогтмол асаалттай байлгахыг зөвлөж байна.
Мөн галлагааны өмнө зуух, пийшингийн битүүмжлэл, яндангийн таталтыг шалгаж хаалт, сойлтыг бүрэн хаахгүй байхыг анхаарууллаа.
Угаарын хийн эрсдэлээс сэргийлэхэд 8.2 тэрбум төгрөг төсөвлөжээ
Түлш хэрэглэгчдэд үйлчлэх төв ОНӨААТҮГ-ын 2026 оны үйл ажиллагааны зардалд нийслэлийн төсвөөс 8.2 тэрбум төгрөг баталсан байна.
Тус байгууллагын 500 гаруй ажилтан 24 цагийн ээлжээр нийслэлийн хатуу болон хийн түлш хэрэглэдэг өрхүүдэд хяналт, зөвлөгөө, урьдчилан сэргийлэх үйлчилгээ үзүүлдэг аж.
Угаарын хордлогын шинж тэмдэг илэрвэл яаралтай тусламж дуудаарай
Хордлогын үед толгой өвдөх, дотор муухайрах, бөөлжих, толгой эргэх, бие сулрах, ухаан самуурах, ухаан алдах зэрэг шинж тэмдэг илэрдэг. Энэ тохиолдолд нэн даруй цэвэр агаарт гарах, 103 дугаарт яаралтай тусламж дуудахыг мэргэжилтнүүд зөвлөжээ. Мөн угаарын хий мэдрэгчийн дохио ассан охиолдолд шинж тэмдэг илрээгүй байсан ч аюулгүй орчинд гарч, 7011-9410 дугаарт холбогдон мэдэгдэх хэрэгтэйг санууллаа.
Шинэ мэдээг цахим шуудангаар авах бол бүртгүүлнэ үү.
Холбоотой мэдээ
