Хувиараа хөдөлмөр эрхлэгчдийн ЭМД-ын шимтгэл 1.7 тэрбум, тусламж үйлчилгээний санхүүжилт 8.9 тэрбум төгрөгт хүрчээ

Эрүүл мэндийн даатгалын шимтгэлээ өөрөө төлдөг иргэдийн өнгөрсөн есдүгээр сарын шимтгэлийн орлого болон тусламж, үйлчилгээний санхүүжилтийн мэдээллийг Эрүүл мэндийн даатгалын ерөнхий газар танилцууллаа.

Хувиараа хөдөлмөр эрхлэгч 107,985 иргэн есдүгээр сард 1.7 тэрбум төгрөгийн шимтгэл төлжээ. Харин энэ бүлгийн даатгуулагчдын авсан 54,469 тохиолдлын эрүүл мэндийн тусламж, үйлчилгээнд Эрүүл мэндийн даатгалын сангаас 8.9 тэрбум төгрөгийн санхүүжилт олгосон байна.

Ингэснээр хувиараа хөдөлмөр эрхлэгчдийн тухайн сард төлсөн шимтгэлээс тэдний тусламж, үйлчилгээнд зарцуулсан санхүүжилт 5.2 дахин өндөр гарчээ.

Оюутнуудын хувьд 39,894 хүн 631.9 сая төгрөгийн шимтгэл төлсөн бол 24,163 тохиолдлын тусламж, үйлчилгээнд 3.4 тэрбум төгрөгийг сангаас санхүүжүүлсэн байна. Энэ нь тухайн бүлгийн төлсөн шимтгэлээс ойролцоогоор 5.4 дахин өндөр дүн юм.

Мөн 10,083 малчин 159.7 сая төгрөгийн шимтгэл төлж, 3,191 тохиолдлоор 10 төрлийн эрүүл мэндийн тусламж, үйлчилгээ авчээ. Үүнд Эрүүл мэндийн даатгалын сангаас 683.3 сая төгрөг зарцуулсан нь төлсөн шимтгэлээс 4.3 дахин өндөр байна.

Харин гадаадын иргэн болон харьяалалгүй 109 хүн 3.4 сая төгрөгийн шимтгэл төлсөн бөгөөд тэдний авсан дөрвөн төрлийн тусламж, үйлчилгээний 40 тохиолдолд 3.2 сая төгрөгийн санхүүжилт олгожээ.

Дээрх дөрвөн бүлгийн мэдээллийг нэгтгэвэл есдүгээр сард нийт 158,071 иргэн ойролцоогоор 2.5 тэрбум төгрөгийн шимтгэл төлсөн бол 81,863 тохиолдлын тусламж, үйлчилгээнд 13 тэрбум орчим төгрөгийг Эрүүл мэндийн даатгалын сангаас санхүүжүүлсэн байна.

Энэ нь эрүүл мэндийн даатгалын сангийн эрсдэл хуваалцах зарчмыг харуулж байгаа бөгөөд даатгуулагчийн тухайн сард төлсөн шимтгэл болон авсан тусламж, үйлчилгээний зардал заавал тэнцүү байх шаардлагагүй юм. Сангийн санхүүжилт нь зөвхөн тухайн сарын шимтгэлээр бус, нийт даатгуулагчдын шимтгэл болон бусад эх үүсвэрээр бүрддэг.