"Рио Тинто" нишингийн бахтай "дайн зарлана"

“Рио Тинто” компани Австралийн баруун хойд хэсгийн Пилбара бүс нутагт нишингийн бах тархахаас урьдчилан сэргийлэх зорилгоор 28 сая австрали долларын байгаль хамгааллын хөтөлбөр хэрэгжүүлэхээр төлөвлөж байна.

Тус компани “Rhodes Ridge Joint Venture” хамтарсан үйлдвэрийн түншүүдтэйгээ хамтран таван жилийн хугацаанд хэрэгжүүлэх хөтөлбөрийг 2027 онд эхлүүлэх юм.

Нишингийн бах нь арьсныхаа хорт бодисоор махчин амьтдыг ч хордуулдаг байна.

Иймээс “Рио Тинто”-ийн хөтөлбөр нь бах Пилбарагийн эмзэг экосистемд тархах замыг хязгаарлаж, амьтдын амьдрах орчин болон нутгийн иргэдийн уламжлалт хүнсний нөөцийг хамгаалахад чиглэж байна.

685 усны байгууламжийг өөрчилж, бахын тархалтыг хязгаарлана

Хөтөлбөрийн хүрээнд Энэтхэгийн далайн эргээс Их элсэн цөл хүртэл үргэлжлэх, Брум хотын өмнөд хэсэгт байрлах хамгаалалтын бүс байгуулах аж.

Энэхүү бүс нь нишингийн бахын тархалтыг хязгаарлах хуурай коридорын үүрэг гүйцэтгэх юм.

Төслийн хүрээнд зургаан мал аж ахуйн станцын нутаг дэвсгэр дэх 685 усны байгууламжийг өөрчлөх, эсвэл бах хүрэхээс нь хамгаалах арга хэмжээ авахаар төлөвлөжээ.

Нишингийн бахын амьдрах, үржихэд ус болон чийглэг орчин чухал учраас хуурай газрын усны эх үүсвэрт хүргэхгүй болсноор бах уснаас усанд шилжин тархах эрсдэлийг бууруулах боломжтой гэж судлаачид үзэж байна.

Гэхдээ энэ нь бүс нутгийн бүх усан байгууламжийг хаана гэсэн үг биш, харин хэрэгжүүлэх арга хэмжээг малчид, газар эзэмшигчид болон бусад оролцогч талтай хамтран зохион байгуулах шаардлагатай гэж онцолжээ.

27 сая га орчныг хамгаална

Хөтөлбөрийн хэрэгжих бүс нь 7,500 ам дөрвөлжин километр талбайг хамрах бөгөөд цаашлаад 27 сая га амьдрах орчныг нишингийн бахын тархалтын эрсдэлээс хамгаалах зорилготой.

Мөн бахын нөлөөнд өртөмтгий 25 орчим амьтны зүйл, нутгийн иргэдийн уламжлалт хүнсний нөөцийг хамгаалахад чиглэж байна.

Төслийн оролцогч Роберта Хантерын мэдээлснээр нишингийн бах нь нутгийн уугуул иргэдийн хүнсэндээ уламжлал болгон ашиглаж ирсэн амьтад болон усны нөөцөд аюул учруулж байгаа аж.

Иймээс уг хөтөлбөр нь зөвхөн нэг төрлийн амьтны тархалтыг хязгаарлах бус, тухайн бүс нутгийн биологийн олон янз байдал, уламжлалт амьжиргаа болон байгалийн нөөцийн тогтвортой байдлыг хамгаалах юм.

Нишингийн бах 20 жилийн дотор Пилбарад хүрч болзошгүй

Судлаач Бен Филлипсийн анхааруулснаар нишингийн бахын тархалтыг хязгаарлах арга хэмжээ авахгүй бол ойрын 20 жилийн хугацаанд Пилбара бүс нутагт ч хүрч болзошгүй.

Харин Тим Демпстер амьдрах орчны нөхцөлийг өөрчлөх, ялангуяа усны хүртээмжийг зохицуулах замаар бахын тархалтыг зогсоох боломжтойг тайлбарлажээ.

Төсөлд Австралийн Кёртин болон Дикин их сургуулийн судлаачид, нутгийн уугуул газар эзэмшигчид, малчид, төрийн байгууллагууд болон салбарын төлөөлөл оролцох юм.

Төслийн түншүүд санхүүжилтийг тэнцүү хуваана

“Rhodes Ridge Joint Venture” хамтарсан үйлдвэрийн 50 хувийг “Рио Тинто”, 40 хувийг Японы “Mitsui”, үлдсэн 10 хувийг “AMB Holdings” эзэмшдэг.

Байгаль хамгааллын 28 сая австрали долларын санхүүжилтийг “Рио Тинто” болон хамтарсан үйлдвэрийн бусад түнш хоёр тал болон тэнцүү хувааж гаргахаар тохиролцжээ.

Ингэснээр тус компани 14 сая австрали доллар, бусад түншүүд нийлээд 14 сая австрали долларын санхүүжилт гаргах зохицуулалттай.