“LIV Golf” дампуурах уу: Ивээн тэтгэгч нь $300 саяар санхүүжүүлэхээс татгалзав

Мэргэжлийн гольфын “LIV Golf” лигийн шинэчилсэн үйл ажиллагааг санхүүжүүлэхээр төлөвлөж байсан “BC Partners Credit” компани 300 сая ам.доллар хүртэлх хөрөнгө оруулалтын төлөвлөгөөнөөсөө татгалзжээ. Ингэснээр санхүүгийн хүндрэлд орж, дампуурлын хамгаалалт хүсээд буй тус лигийн цаашдын үйл ажиллагаа тодорхойгүй болж, татан буугдах эрсдэл нэмэгдсэн байна.

Ассошиэйтед Пресс агентлагийн мэдээлснээр “BC Partners Credit” шинэчилсэн лигт тоглогчдын оролцоо хангалтгүй байна гэж үзсэн нь санхүүжилтийн төлөвлөгөөнөөс татгалзахад нөлөөлжээ. “LIV 2.0” нэртэй шинэ бүтцээр тоглогчид лигийн олонхийн эзэмшигч болж, багийн тэмцээнд илүү төвлөрсөн, зардал багатай үйл ажиллагаа явуулахаар төлөвлөж байв.

Гэвч ойролцоогоор 30 тоглогч шинэчилсэн лигт үлдэх сонирхолтой байсан ч ердөө дөрөв нь олон нийтэд дэмжихээ илэрхийлсэн байна. Жон Рам, Серхио Гарсиа, Луис Оостхёйзен, Тайрелл Хаттон зэрэг нэр хүндтэй тоглогч лигээс гарах шийдвэрээ мэдэгджээ.

Саудын Арабын сан таван тэрбум гаруй ам.доллар зарцуулжээ

“LIV Golf” лигийг 2022 онд Саудын Арабын Олон нийтийн хөрөнгө оруулалтын сангийн санхүүжилтээр байгуулжээ. Тус сан лигийн үйл ажиллагаанд таван тэрбум гаруй ам.доллар зарцуулсан боловч 2026 оны улирлын дараа санхүүжилтээ үргэлжлүүлэхгүй гэдгээ дөрөвдүгээр сард мэдэгдсэн байна.

Үүний дараа “LIV Golf” есдүгээр сарын 8-нд АНУ-ын Нью Жерси мужийн шүүхэд "Дампуурлын тухай" хуулийн 11 дүгээр бүлгийн дагуу хамгаалалт хүсчээ. Энэ нь үйл ажиллагаагаа шууд зогсоох бус, өр төлбөрөө дахин зохион байгуулж, шинэ хөрөнгө оруулагчтайгаар үйл ажиллагаагаа үргэлжлүүлэх боломжийг эрэлхийлсэн алхам байв.

Аравдугаар сарын эхээр “BC Partners Credit” 300 сая ам.доллар хүртэлх санхүүжилт олгохоор төлөвлөж байгаагаа зарласан. Шинэчилсэн бүтцээр тоглогчид лигийн 52.5, “BC Partners” болон бусад хөрөнгө оруулагчид 45, удирдлагын баг 2.5 хувийг эзэмшихээр тусгасан байжээ.

Мөн “LIV 2.0” хувилбарын хүрээнд 2027 онд дор хаяж 10 тэмцээн зохион байгуулж, багийн оролцоо болон тоглогчдын өмчлөлийг нэмэгдүүлэхээр төлөвлөсөн юм.

Гэвч гол хөрөнгө оруулагч санхүүжилтээс татгалзсанаар уг төлөвлөгөөг хэрэгжүүлэх боломж эргэлзээтэй болж байна.

Арваннэгдүгээр сарын 5-ны шүүх хурал лигийн ирээдүйд нөлөөлнө

“LIV Golf”-ийн дампуурлын хэрэгтэй холбоотой шүүх хуралдаан арваннэгдүгээр сарын 5-нд товлогджээ. Анх тоглогч Жон Рамын гэрээтэй холбоотой асуудлыг хэлэлцэхээр төлөвлөж байсан ч одоо лигийг татан буулгах асуудал гол сэдэв болох төлөвтэй.

Хэрэв шүүхийн ажиллагаа хөрөнгө татан буулгах чиглэлд шилжвэл лигийн үлдэгдэл хөрөнгө, өр төлбөр, тоглогчидтой байгуулсан гэрээ болон бусад санхүүгийн үүргийг хэрхэн барагдуулах асуудал үүснэ. Жон Рам лигийн ирээдүйн талаар тодорхойгүй асуудал олон байгааг онцолсон байна.

“LIV Golf” лигийн 2026 оны сүүлчийн тэмцээн наймдугаар сард болсон бөгөөд 2027 оны улирлыг шинэчилсэн бүтэцтэйгээр эхлүүлэх төлөвлөгөө ийнхүү эргэлзээтэй болов.