Улаанбаатарын хамгийн том ус хангамжийн эх үүсвэр болох Баруун эх үүсвэрийг төвийн сүлжээнд холболоо

Улаанбаатар хотын ус хангамжийн шинэ Баруун эх үүсвэрийг арваннэгдүгээр сарын 2-ны өглөө хотын төвлөрсөн сүлжээнд холбож, ус нийлүүлж эхэллээ.

МҮОНРТ-ийн мэдээлснээр, Монгол Улсын Засгийн газар, АНУ-ын Мянганы сорилтын корпорацын хооронд байгуулсан 2 дахь компакт гэрээний хүрээнд дэвшилтэт технологиор барьсан Баруун эх үүсвэрээс ус дамжуулах 700–1000 мм голчтой, 9 км урт шугамыг төвлөрсөн сүлжээнд холбож, эхний ээлжинд хоногт 14 мянган шоо метр ус нийлүүлж эхэлжээ.

Нийслэлчүүд хоногт дунджаар 190–210 мянган шоо метр ус хэрэглэдэг бол Баруун эх үүсвэр дангаараа хоногт 130–144 мянган шоо метр ус нийлүүлэх хүчин чадалтай. Энэ нь Улаанбаатар хот төдийгүй Монгол Улсын хэмжээнд хамгийн том ус хангамжийн эх үүсвэр болж байна.

Ус сувгийн удирдах газрын дарга Ц.Төрхүү «Улаанбаатар хотын унд ахуйн усыг 10 эх үүсвэрээс хангадаг. Шинэ эх үүсвэр ашиглалтад орсноор хоногт 350–360 мянган шоо метр ус нийлүүлэх инженерийн шийдэл бүрдсэн. Ингэснээр Улаанбаатарт 2050–2055 он хүртэл усны асуудал үүсэхгүй» гэжээ. Тэрээр гүний уснаас гадна гадаргын усыг ашиглах «Туул усан цогцолбор» төслийн техник, эдийн засгийн үндэслэлийг боловсруулж, Хот байгуулалт, барилга, орон сууцжуулалтын яаманд хүлээлгэн өгснийг мөн дурдлаа.

Улаанбаатар хотын 2040 он хүртэлх хөгжлийн ерөнхий төлөвлөгөөнд хотын хүн ам 2040 онд 2.3 саяд хүрнэ гэж тооцсон бөгөөд шинэ эх үүсвэр ашиглалтад орсноор энэ хүн амд шаардлагатай унд ахуйн усыг бүрэн хангах боломжтой гэж үзэж байна.