Уул уурхайн компаниуд инновацаа хурдасгахгүй бол худалдан авалтын бай болж болзошгүй

Уул уурхайн компаниуд технологийн шинэчлэл, инновацын хөрөнгө оруулалтаа эрчимжүүлэхгүй бол бусад салбарын томоохон компаниудын худалдан авалтын бай болж магадгүйг “Anglo American”-ийн гүйцэтгэх захирал асан Марк Катифани анхаарууллаа.

Тэрбээр Австралийн Сидней хотод болсон Олон улсын уул уурхай, нөөцийн бага хурал (IMARC 2026)-ын үеэр олборлолтын гүн нэмэгдэж, шинэ уурхайн зөвшөөрөл авах хугацаа уртасч, ашигт малтмалын нөөцийг нөхөн бүрдүүлэхэд хүндрэл учирч байгааг онцолжээ.

Катифанигийн үзэж байгаагаар уул уурхайн салбар эдгээр сорилтыг даван туулах технологийг хангалттай хурдтай хөгжүүлж чадахгүй байгаа нь ирээдүйн ашигт малтмалын нийлүүлэлтэд эрсдэл үүсгэж байгаа аж.

Уурхайн олборлолтын гүн жилд дунджаар 40 метрээр нэмэгдэж байна

Марк Катифанигийн тооцоолсноор уурхайн олборлолтын гүн жилд дунджаар 40 метрээр нэмэгдэж байгаа бөгөөд энэ хандлага үргэлжилбэл ирэх арван жилд олборлолтын түвшин одоогийнхоос 400–500 метрээр гүнзгийрэх аж.

Ордын гүн нэмэгдэхийн хэрээр хүдэр олборлох, тээвэрлэх, уурхайн агааржуулалт, аюулгүй ажиллагааг хангах зэрэг нь илүү төвөгтэй болно. Ийм нөхцөлд автоматжуулалт, олборлолтын шинэ арга технологи болон үйлдвэрлэлийн бүтээмжийг нэмэгдүүлэх шийдэл чухал болж байгааг тэрбээр онцолжээ.

Мөн шинэ уурхайн төсөлд шаардлагатай зөвшөөрөл авах үйл явц зарим тохиолдолд 20 хүртэл жил үргэлжилж байгааг дурдсан байна.

Шинэ төслүүдийн хэрэгжилт удаашрахын зэрэгцээ ашиглаж буй ордуудын олборлолтын нөхцөл хүндрэх нь компаниудын нөөцийг нөхөн бүрдүүлэх, урт хугацаанд үйлдвэрлэлээ тогтвортой хадгалах боломжийг хязгаарлахад нөлөөлөх юм.

Катифани 2010 онд “General Electric”-ийн тухайн үеийн гүйцэтгэх захирал Жефф Иммельттэй уулзахдаа уул уурхайн салбар инновацаа хангалттай хурдтай хөгжүүлэхгүй бол ирээдүйд бусад үйлдвэрлэлд шаардлагатай түүхий эдийг нийлүүлэхэд хүндрэл үүснэ гэж анхааруулж байснаа дурсжээ.

Түүний үзэж байгаагаар өнгөрсөн хугацаанд энэ сорилтыг шийдвэрлэхэд хангалттай ахиц гараагүй байна.

Уул уурхайн төслүүдийн 30 хүрэхгүй хувь нь ордын бүрэн боломжийг ашиглаж байна

Катифани дэлхийн уул уурхайн төслүүдийн 30 хүрэхгүй хувь нь ордын боломжит нөөц, хүчин чадлыг бүрэн ашиглахаар төлөвлөгдсөн эсвэл тэр түвшинд ажиллаж байгаа гэж тооцоолжээ.

Түүний тайлбарласнаар томоохон ордыг ашиглахдаа зөвхөн эхний шатны үйлдвэрлэлийн хэмжээнд тулгуурлан шийдвэр гаргах нь урт хугацаанд ашиглах боломжтой нөөц, дэд бүтцийн хүчин чадлыг дутуу үнэлэх эрсдэлтэй.

Иймээс шинэ төслийн хөрөнгө оруулалтыг шийдвэрлэхдээ ашигт малтмалын үнийн олон хувилбарыг тооцох, зах зээлийн таагүй нөхцөлд ч төслийн эдийн засгийн үр ашгийг хадгалах боломжийг үнэлэх шаардлагатайг тэрбээр зөвлөсөн байна.

Мөн уурхайн дэд бүтэц, орон нутгийн хөгжилд чиглэсэн хөрөнгө оруулалтыг зөвхөн анхны үйлдвэрлэлийн хүчин чадлаар бус, ордын урт хугацааны боломжтой уялдуулахыг онцолжээ.

Инновацын хоцрогдол компаниудын худалдан авалтын эрсдэлийг нэмэгдүүлнэ

Катифани “Anglo American”-ийг удирдаж байх хугацаандаа “FutureSmart Mining” хөтөлбөрөөр дамжуулан технологийн шинэчлэл, үйлдвэрлэлийн үр ашиг, аюулгүй ажиллагааг сайжруулахад анхаарч байжээ.

Түүний хэлснээр технологи, үйл ажиллагааны шинэчлэл нь тус компанийн хувьцаа эзэмшигчдийн жилийн дундаж өгөөжийг есөн жилийн хугацаанд 22 хувьд хүргэхэд хувь нэмэр оруулсан байна.

Тэрбээр уул уурхайн томоохон компаниуд богино хугацааны санхүүгийн үр дүнд хэт төвлөрч, салбарын ирээдүйд шаардлагатай технологийн шийдлүүдэд хангалттай хөрөнгө оруулахгүй байгааг шүүмжилжээ.

Үүний улмаас ашигт малтмалын тогтвортой нийлүүлэлт шаардлагатай бусад салбарын компаниуд уул уурхайн томоохон үйлдвэрлэгчдийг худалдан авах сонирхолтой болж болзошгүй гэж үзэж байна.

“Northern Star Resources”-ийн стратегийн шийдвэрүүд

Марк Катифани өнгөрсөн сарын 1-нээс Австралийн алт олборлогч “Northern Star Resources” компанийн захирлуудын зөвлөлд хараат бус захирлаар ажиллаж эхэлсэн байна.

Түүний томилгоо нь тус компанийн томоохон хувьцаа эзэмшигч “Elliott Investment Management”-ийн санал болгосон удирдлагын өөрчлөлттэй холбоотой.

“Northern Star Resources” одоогоор Баруун Австралийн Калгурли дахь KCGM уурхайн өргөтгөсөн боловсруулах үйлдвэрийн хүчин чадлыг нэмэгдүүлэхийн зэрэгцээ “Hemi” алтны төслийг хөгжүүлж байна.

Тус компанийн мэдээллээр “Hemi” төслийн алтны нөөц, баялгийн тооцоолсон хэмжээ 13.2 сая унц бөгөөд 2027 оны дунд үе гэхэд хөрөнгө оруулалтын эцсийн шийдвэр гаргахаар зорьж байгаа аж.

Үүний зэрэгцээ “Northern Star Resources” компанид “Gold Fields”-ээс худалдан авах санал ирсэн нь уул уурхайн салбарт нэгдэл, худалдан авалтын идэвх нэмэгдэж буйг харуулах нэг жишээ болж байна.