Энхийг сахиулагчдын томилолтын зардал 1,800 ам.доллароор нэмэгдэнэ

Монгол Улсын Засгийн газар НҮБ-ын энхийг дэмжих ажиллагаанд оролцсон цэргийн алба хаагчдад олгох томилолтын зардлын хувь хэмжээг 14 жилийн дараа шинэчилж, 70-аас 80 хувь болгон нэмэгдүүлжээ. Ингэснээр энхийг сахиулагчдын нэг жилийн томилолтын зардал 1,800 орчим ам.доллароор нэмэгдэх боломж бүрдсэн талаар Батлан хамгаалахын сайд цахим хуудсаараа мэдээлсэн байна.

Засгийн газрын 2025 оны аравдугаар сарын 22-ны өдрийн шийдвэрээр НҮБ-аас цэрэг оролцуулагч улсын Засгийн газарт олгодог нөхөн төлбөрийн хуваарилалтыг өөрчилжээ. Өмнө нь уг төлбөрийн 70 хувийг цэргийн алба хаагчдад томилолтын зардал хэлбэрээр олгож, үлдэх 30 хувийг Зэвсэгт хүчний хөгжлийн санд төвлөрүүлдэг байсан бол шинэ зохицуулалтаар энэ харьцаа 80/20 болж өөрчлөгдсөн байна.

Ингэснээр энхийг дэмжих ажиллагаанд оролцож буй цэргийн алба хаагчид Монгол Улсад авч буй үндсэн цалингаа 100 хувь хэвээр авахын зэрэгцээ нэмэгдүүлсэн хувь хэмжээгээр тооцсон томилолтын зардал авах юм. Шинэ зохицуулалт 2025–2026 онд НҮБ-ын энхийг дэмжих ажиллагаанд үүрэг гүйцэтгээд, тухайн хугацаанд эх орондоо ирж буй алба хаагчдад үйлчилнэ.

НҮБ нь энхийг сахиулах ажиллагаанд цэрэг оролцуулсан улс орнуудад нөхөн төлбөр олгодог. Уг төлбөр нь цэргийн алба хаагчдын ажиллагааны өмнөх бэлтгэл сургалт, тээвэр, эрүүл мэндийн үзлэг, вакцинжуулалт, дүрэмт хувцас болон бусад хангалттай холбоотой зардлыг нөхөх зориулалттай.

Монгол Улс 2002 оноос НҮБ-ын энхийг дэмжих ажиллагаанд цэргийн алба хаагчдаа оролцуулж эхэлсэн бөгөөд Батлан хамгаалахын сайдын мэдээлснээр өнгөрсөн хугацаанд 23,700 орчим алба хаагч олон улсын ажиллагаанд үүрэг гүйцэтгэжээ.

Шинэчилсэн зохицуулалтаар 2025–2026 онд үүргээ гүйцэтгээд эх орондоо ирж буй энхийг сахиулагчид томилолтын зардлын нэмэгдлийг авах эхний алба хаагчид болох юм.