НҮБ-ын Ерөнхий Ассамблейн чуулганаар “Монгол Улсын олон улсын аюулгүй байдал, цөмийн зэвсэггүй статусын тухай” тогтоолыг баталлаа
НҮБ-ын Ерөнхий Ассамблейн 81 дүгээр чуулганы Нэгдүгээр хороо Монгол Улсын санаачилсан цөмийн зэвсэггүй статусын тухай тогтоолын төслийг нийтийн зөвшилцлөөр баталжээ.
Гадаад харилцааны яамнаас мэдээлснээр НҮБ-ын Ерөнхий Ассамблейн 81 дүгээр чуулганы Зэвсэг хураах, олон улсын аюулгүй байдлын асуудал эрхэлсэн Нэгдүгээр хороо мягмар гарагийн хуралдаанаараа Монгол Улсын санаачилсан “Монгол Улсын олон улсын аюулгүй байдал, цөмийн зэвсэггүй статусын тухай” тогтоолын төслийг нийтийн зөвшилцлөөр баталжээ.
Тогтоолын төслийг Гадаад харилцааны яамнаас танилцуулсан бөгөөд Монгол Улсын олон улсад хүлээн зөвшөөрөгдсөн цөмийн зэвсэггүй статус нь цөмийн зэвсгээс ангид дэлхий ертөнцийг бий болгох олон улсын хүчин чармайлтад оруулж буй бодит хувь нэмэр болохыг онцолсон байна.
Монгол Улс 1992 онд нутаг дэвсгэрээ цөмийн зэвсэггүй хэмээн зарлаж, 1998 оноос эхлэн уг статусыг дэмжих тогтоолыг НҮБ-ын Ерөнхий Ассамблейд хоёр жил тутам санаачлан хэлэлцүүлж ирсэн. НҮБ-ын албан ёсны баримт бичигт Монгол Улсын энэхүү бодлого нь цөмийн зэвсгийг үл дэлгэрүүлэх, бүс нутгийн итгэлцлийг бэхжүүлэхэд хувь нэмэр оруулж буйг тэмдэглэжээ.
Энэ удаагийн тогтоолын төсөлд 34 улс хамтран зохиогчоор нэгдсэн гэж Гадаад харилцааны яам мэдээлсэн байна. Харин 2024 онд баталсан ижил нэртэй тогтоолд 36 улс хамтран зохиогчоор оролцож байжээ.
Монгол Улсын цөмийн зэвсэггүй статусыг дэмжих энэхүү тогтоол нь тус улсын олон улсын аюулгүй байдал, тусгаар тогтнол, бүрэн эрхт байдал болон нутаг дэвсгэрийн бүрэн бүтэн байдлыг бэхжүүлэх чиглэлээр олон улсын хамтын ажиллагааг үргэлжлүүлэхэд чиглэдэг аж.
Гэхдээ Нэгдүгээр хорооны дэмжлэг нь Ерөнхий Ассамблейн нэгдсэн хуралдаанаар тогтоолыг эцэслэн баталсантай адил биш юм.
Холбоотой мэдээ
