Худалдааны салбарын борлуулалт 12.6 хувиар өссөн ч бодит өсөлт 1.6 хувьтай байна

Үндэсний статистикийн хорооны мэдээлснээр Монгол Улсын худалдааны салбарын борлуулалтын орлого оны эхний есөн сарын байдлаар 54.7 их наяд төгрөгт хүрч, өмнөх оны мөн үеэс 6.1 их наяд төгрөг буюу 12.6 хувиар өсчээ. Гэвч үнийн өөрчлөлтийн нөлөөг хассан бодит өсөлт тайлант хугацаанд 1.6 хувьтай гарсан нь нэрлэсэн өсөлт бодит өсөлтөөс мэдэгдэхүйц өндөр байгааг харуулж байна. Тодруулбал, 2025 оны эхний есөн сард худалдааны салбарын борлуулалтын орлого өмнөх оны мөн үеэс 2.2 хувиар өссөн ч бодит дүнгээр 3.9 хувиар буурч байжээ. Харин энэ онд нэрлэсэн болон бодит өсөлт хоёулаа эерэг үзүүлэлттэй гарсан байна.

Жижиглэн худалдааны борлуулалт 31.3 их наяд төгрөгт хүрлээ Худалдааны салбарын нийт борлуулалтын 57.2 хувийг жижиглэн худалдаа дангаар бүрдүүлж буй бол үлдсэн 42.8 хувийг бөөний худалдаа эзэлжээ. Жижиглэн худалдааны борлуулалтын орлого эхний есөн сард 31.3 их наяд төгрөгт хүрч, өмнөх оны мөн үеэс 3.9 их наяд төгрөг буюу 14 хувиар өссөн байна. Харин бөөний худалдааны борлуулалт 23.4 их наяд төгрөг болж, 10.8 хувиар нэмэгджээ. Бүтээгдэхүүний ангиллаар авч үзвэл нийт борлуулалтын 78.9 хувийг хүнсний бус бүтээгдэхүүн эзэлж, борлуулалтын орлого өмнөх оны мөн үеэс 14.4 хувиар ахин 43.1 их наяд төгрөгт хүрсэн байна.

Нийт борлуулалтын 85.7 хувь нь нийслэлд төвлөрчээ Худалдааны салбарын борлуулалтын орлого гол төлөв нийслэл хотноо төвлөрч байна. Тухайлбал, 2026 оны эхний есөн сарын нийт борлуулалтын 85.7 хувь нь Улаанбаатар хотод, 3.6 хувь нь Өмнөговь аймагт ногдож байгаа бол Дархан-Уул болон Орхон аймаг тус бүр 1.2 хувийг бүрдүүлжээ. Ингэснээр эдгээр дөрвөн бүс нутаг худалдааны салбарын нийт борлуулалтын 91.8 хувийг эзэлж байна. Харин борлуулалтын орлогын жилийн өсөлтөөр Төв аймаг 32.5 хувиар тэргүүлж, Дорноговь аймаг 29.8 хувиар удаалсан бол Өвөрхангай аймаг 19.5 хувиар гуравдугаарт эрэмблэгдэж буй. Мөн Говь-Алтай аймагт борлуулалтын орлого 2.4 хувиар өссөн нь аймгуудын дундаас хамгийн бага үзүүлэлт болсон байна. Ийнхүү худалдааны салбарын борлуулалтын орлого хоёр оронтой хувиар өссөн ч бодит өсөлт харьцангуй бага байгаа нь салбарын гүйцэтгэлийг зөвхөн мөнгөн дүнгээр бус, үнийн өөрчлөлтийг тооцсон үзүүлэлтээр үнэлэх шаардлагатайг харуулж байна.