Нийтийн хоол, зочид буудлын салбарын орлого 10.5%-аар өссөн ч бодит өсөлт 0.2%-тай байна

Үндэсний статистикийн хорооны мэдээлснээр Монгол Улсын нийтийн хоол, байр сууцаар хангах салбарын орлого оны эхний есөн сард өмнөх оны мөн үеэс 10.5 хувиар өссөн ч үнийн өөрчлөлтийн нөлөөг хассан бодит өсөлт ердөө 0.2 хувьтай гарлаа. Тодруулбал, нийтийн хоолны салбарын бодит өсөлт 0 хувьтай байсан бол байр сууцаар хангах салбарынх 1.7 хувьтай гарсан байна. Ийнхүү хоёр салбарын орлого мөнгөн дүнгээр өссөн ч үнийн нөлөөг хасч тооцвол бодит өсөлт бараг ажиглагдсангүй.

Ресторануудын орлого 1 их наяд төгрөг давжээ Нийтийн хоолны салбарын орлого оны эхний есөн сард 1.71 их наяд төгрөгт хүрч, өмнөх оны мөн үеэс 155.5 тэрбум төгрөг буюу 10 хувиар өссөн байна. Үүнд рестораны орлого 78.9 тэрбум төгрөгөөр нэмэгдсэн нь хамгийн их хувь нэмэр оруулжээ. Тухайлбал, рестораны орлого 1.06 их наяд төгрөгт хүрч, өмнөх оны мөн үеэс 8 хувиар өссөнөөр нийтийн хоолны салбарын нийт орлогын 62.1 хувийг бүрдүүлсэн байна. Харин катерингийн үйлчилгээний орлого 301.2 тэрбум төгрөгт хүрч, 11.2 хувиар, цайны газрын орлого 171.4 тэрбум төгрөг болж, 14.9 хувиар тус тус нэмэгджээ. Нийтийн хоолны үйлчилгээний төрлүүдээс кафе хамгийн өндөр хувийн өсөлт үзүүлсэн байна. Кафены орлого өмнөх оны мөн үеэс 19.5 хувиар өсөлт үзүүлж, 93.4 тэрбум төгрөгт хүрсэн бол баарны орлого 12.2 хувиар нэмэгдэж, 80.9 тэрбум төгрөг болжээ.

Гурав ба түүнээс дээш одтой зочид буудлын орлого 22.4 хувиар өсчээ Байр сууцаар хангах салбарын орлого 2026 оны эхний есөн сард 311 тэрбум төгрөгт хүрч, өмнөх оны мөн үеэс 36.1 тэрбум төгрөг буюу 13.1 хувиар нэмэгджээ. Үүнд гурав ба түүнээс дээш одтой зочид буудлын орлого 25.8 тэрбум төгрөгийн өсөлт үзүүлж, 140.7 тэрбум төгрөгт хүрсэн нь голлон нөлөөлсөн байна. Тус ангиллын зочид буудлуудын орлого өмнөх оны мөн үеэс 22.4 хувиар нэмэгдсэн нь байр сууцаар хангах үйлчилгээний бусад ангиллаас өндөр өсөлт юм. Харин зэрэглэлгүй зочид буудал, амралтын газрын орлого 160 тэрбум төгрөгт хүрч, 6.2 хувиар өссөн бол хоёр одтой зочид буудлын орлого 10.3 тэрбум төгрөг болж, 10.6 хувиар ахижээ. Ингэснээр байр сууцаар хангах салбарын нийт орлогын 51.4 хувийг зэрэглэлгүй зочид буудал, амралтын газар, 45.2 хувийг гурав ба түүнээс дээш одтой зочид буудал бүрдүүлсэн байна.

Үйлчилгээний салбарын орлого Улаанбаатарт төвлөрсөн хэвээр байна Нийтийн хоолны салбарын нийт орлогын 80.1 хувь буюу 1.37 орчим их наяд төгрөг Улаанбаатар хотод ногдож байна. Харин орон нутгаас Өмнөговь аймаг 120.8 тэрбум төгрөгийн орлогоор тэргүүлж, Орхон аймаг 33.8 тэрбум, Дархан-Уул аймаг 30.8 тэрбум төгрөгийн орлоготой гарчээ. Байр сууцаар хангах салбарын хувьд ч нийслэлийн төвлөрөл өндөр байна. Тус салбарын нийт орлогын 74.2 хувь буюу 230.6 тэрбум төгрөг Улаанбаатар хотод ногдож байгаа нь орон нутгийн нийлбэр орлогоос бараг гурав дахин өндөр үзүүлэлт юм.