McDonald’s АНУ-д өөрийн медиа сүлжээ байгуулахаар зарлаж, шинэ өндөр ашигтай орлогын эх үүсвэр хайнэ

McDonald’s Лхагва гарагт АНУ-д өөрийн медиа сүлжээг байгуулах төлөвлөгөөгөө зарлаж, Amazon болон Walmart-ийн жишгийг даган шинэ өндөр ашигтай орлогын эх үүсвэр хайж буйгаа ил болголоо. Компанийн хувьд үхрийн мах зэрэг гол орцуудын өртөг өсөж буй нөхцөлд нэмэлт зардал бага, маржин өндөртэй орлогын урсгал бий болгох нь нэн тэргүүний зорилт болж байна. Энэ санаачилгыг Чикаго дахь төв байранд болсон хөрөнгө оруулагчдын өдөрлөгийн үеэр танилцуулсан бөгөөд рестораны шинэчлэл, хоолны чанарыг сайжруулах төлөвлөгөөгөө мөн дэлгэрүүлжээ.

Хөтөлбөрийн эхний туршилт аль хэдийн эхэлсэн байна. Наймдугаар сард АНУ дахь компанийн эзэмшлийн 450 рестораны drive-thru захиалгын дижитал самбарт бусад компанийн сурталчилгааг харуулж эхэлсэн нь уг медиа сүлжээний “анхны талбар” болж байна. Гэвч энэ нь одоогоор франчайз эзэмшигчдийн ажиллуулдаг үлдсэн байршлуудад нэвтрээгүй бөгөөд АНУ даяарх 14,000 орчим салбарыг хараахан хамраагүй байгаа юм.

McDonald’s энэ ажлыг өргөжүүлж чадвал цаашдаа 1 тэрбум ам.долларын бизнес болж өсөх боломжтой гэж үзэж байна. Компанийн тооцооллоор ирэх 10 жилд ресторануудын шинэчлэлд олон тэрбум ам.доллар зарцуулахаар төлөвлөж буй цаг үед тогтвортой, өндөр маржинтай орлого нь хөрөнгө оруулалтыг санхүүжүүлэх боломжийг нэмэгдүүлнэ. Өөрөөр хэлбэл, борлуулалтын өсөлтөөс гадна дотоод “медиа тавцан”-аасаа мөнгөжих хувилбарыг зэрэгцүүлэн бий болгох гэж байна.

Салбарын чиг хандлага ч энэ мөрийг дэмжиж байгаа дүр зурагтай. Amazon 2025 онд сурталчилгааны үйлчилгээний борлуулалтаас 68.6 тэрбум ам.долларын орлого олж, нийт орлогынх нь 10 хувьд дөхөж очсон гэж мэдээлсэн. Тус компани Prime Video, Twitch зэрэг сувгуудаар дамжуулан рекламын бизнесээ тэлсээр ирсэн нь худалдаа, контент, өгөгдлийн огтлолцолд “худалдааны медиа”-гийн эрэлт хэрхэн нэмэгдэж буйг харуулна.

Walmart ч мөн адил энэ зах зээлийг идэвхтэй тэлж байна. Тус компанийн АНУ дахь зар сурталчилгааны Connect нэгжийн борлуулалт санхүүгийн хоёрдугаар улиралд 43 хувиар өссөн гэж мэдээлсэн бөгөөд 2024 оны сүүлээр Vizio-г худалдан авч, зар сурталчилгааны бизнесээ өргөжүүлэх зорилготойгоо илэрхийлсэн. Ийм жишээнүүдийн дунд McDonald’s хэрэглэгчийн хөл хөдөлгөөн, брэндийн давтамж дээр суурилсан өөрийн давуу талдаа түшиглэн зах зээлд байр сууриа тодорхойлохыг зорьж байна.

McDonald’s-ийн гүйцэтгэх захирал Морган Флэтли “Худалдааны медиа нь зар сурталчилгааны хамгийн хурдтай өсөж буй салбаруудын нэг бөгөөд 2028 он гэхэд зөвхөн АНУ-д 100 тэрбум ам.доллароос давах төлөвтэй” гэж мэдэгдэв. Тэрээр мөн “Нэмэлт өртөг бараг шаардахгүй, үйл ажиллагааны төвөг нэмэхгүй, хэрэглэгчийн туршлагыг алдагдуулахгүйгээр системд орлого бий болгох боломж” гэж тодорхойлсон нь энэ санаачилгын гол амлалт юм. Харин McDonald’s-ийн ахлах удирдлага Иан Борден “Бид салбар харгалзахгүйгээр өөрийн хэмжээ, цар хүрээтэй компаниуд дундаа хамгийн үнэ цэнтэй брэндүүдийн нэгтэй” гээд, “АНУ-ын хүн амын ойролцоогоор 85 хувь нь жилд дор хаяж нэг удаа манайд үйлчлүүлдэг, дээр нь АНУ даяар 14,000 салбартай тул хүрэлт онцгой” хэмээн онцоллоо. Одоо гол асуулт нь туршилтыг франчайзын сүлжээнд хэрхэн, ямар хурдтай тэлж чадах, мөн сурталчилгаа хэрэглэгчийн туршлагатай мөргөлдөхгүй байх амлалтаа бодитоор биелүүлэх эсэх дээр төвлөрч байна.