Ш.Энхийн-Од NBA-ийн Хөгжлийн лигт анхны улирлаа угтана

Сагсан бөмбөгч Ш.Энхийн-Од NBA-ийн хөгжлийн лигийн “Оссеола Мэжик” багийн шинэ улирлын нээлтийн албан ёсны бүрэлдэхүүнд багтжээ. “Орландо Мэжик” багийн хөгжлийн лигийн харьяа баг арваннэгдүгээр сарын 4-нд 2026–2027 оны улирлыг эхлүүлэх 13 тоглогчийн нэрийг зарласан байна.

Ш.Энхийн-Од тус багт 55 дугаартай, хамгаалагчийн байрлалд бүртгэгджээ. Багийн бүрэлдэхүүнд NBA-ийн “Орландо Мэжик” клубтэй хоёр талт гэрээ байгуулсан Колин Каслтон, Алекс Моралес, Изая Нельсон нар мөн багтжээ. Улирлын бэлтгэлд оролцсон 16 тоглогчоос гурвыг чөлөөлж, үндсэн бүрэлдэхүүнээ 13 болгон цөөлсөн байна.

“Оссеола Мэжик” шинэ улирлын эхний тоглолтоо арваннэгдүгээр сарын 8-нд Флорида мужийн Киссимми хотын “Silver Spurs Arena” ордонд “Оклахома Сити Блю” багийн эсрэг хийнэ. Тоглолт орон нутгийн цагаар 15:00 цагт буюу Улаанбаатарын цагаар арваннэгдүгээр сарын 9-ний 04:00 цагт эхлэх хуваарьтай.

Нээлтийн тоглолтын тасалбарын үнэ борлуулалтын сувгаас хамааран ялгаатай байна. Тухайлбал, “SeatGeek” платформд хамгийн хямд тасалбар 20 ам.доллароос эхэлж байгаа бол зарим борлуулалтын сувгаар илүү өндөр үнэтэй суудлууд санал болгожээ.

“Оссеола Мэжик” 2021 оны хөгжлийн лигийн аварга

“Оссеола Мэжик” нь NBA-ийн “Орландо Мэжик” багийн хөгжлийн лигийн харьяа клуб юм. Тус баг 2017–2018 оны улирлаас Флорида мужийн Лейкленд хотод “Лейкленд Мэжик” нэрээр тоглож эхэлсэн бөгөөд 2023 онд Киссимми хот руу нүүж, одоогийн нэрээ авчээ. Тус баг 2021 онд NBA-ийн хөгжлийн лигийн аварга болж, 2025 онд лигийн финалд шалгарч байсан юм.